Ronella Croes, CEO di ATA:
ORANJESTAD (AAN) CEO di Aruba Tourism Authority, señora Ronella Croes, den entrevista cu DIARIO tocante e desaroyo di turismo di Aruba, actualmente, unda el a declara cu e Mercado di Merca a keda stabil durante e prome mitad di 2025 aki, tambe e mercado di Canada a crece cu 7.7% y esun di Latinoamerica a subi cu 20.7%.
Y pa loke ta trata Europa, aunke e ta registra un caida leve di 1%, ATA ta proyecta cu e lo por cera aña na 9% di crecemento. “Pues, e cifranan ta papia pa nan mes. Esaki ta loke nos a capta e prome mita di e aña aki”, Ronella Croes, CEO di ATA a señala.
El a sigui bisa cu si mira den e di dos mita di aña, con e ta bayendo, e mesun tipo di feedback aki, consultando diferente socio ATA ta mira cu turismo lo por ta creciendo entre 4% y 5% compara cu aña pasa. “Esey ta loke nos tin na proyeccion aworaki, y esey ta inclui un Merca cu lo keda stabil, kizas cu un adelanto si, mirando cu tin un tiki capacidad di asiento extra, cu a logra di acomoda”, Ronella Croes a señala.
“Mi ta bisa ‘logra’ pasobra e demanda pa ampliacion di vuelonan y capacidad aereo, for di Merca den e caso aki, ta hopi halto y esey ta refleho di e demanda tambe, fuerte pa Aruba”, Ronella Croes a indica.
E directora di ATA a señala cu esaki ta duna un tiki mas contexto na e resultadonan, y locual por ta e señal cu kizas e hendenan ta gasta un tiki menos, of kizas ta gasta un tiki mas na acomodacion y menos na otro cos. Kizas e cautela tambe ta refleha eynan.
“Y esey nos ta finalizando encuestanan na aeropuerto; ora cu bishitantenan bay for di Aruba nos ta encuesta nan cara-cara, y djeynan nos ta haya patronchi di gasto, y con esaki ta moviendo”, Croes a agrega.
Segun Ronella Croes, pronto kizas ATA lo tin mas informacion di esaki fuera di otro analisis cu nan ta haci pa cu esey.
