Organo Ehecutivo AZV ta informa
ORANJESTAD (AAN): E siman aki, Organo Ehecutivo di AZV ta informa cu a nombra entrante 1 di januari 2024, drs. Olga Rodriguez como Manager Division Cuido.
Señora Rodriguez ta dispone di un bachelor den Fysioterapia y un master den Maneho y Administracion di Cuido. Señora Rodriguez ta conta cu experiencia den maneho di cuido tanto na Hulanda como na Aruba, a fungi como project manager na AIB Bank y desde 2006 ta den servicio di dr. Horacio Oduber hospital. Na dicho instituto señora Rodriguez a ocupa funcionnan di consehero riba calidad, ICT-projectmanager, manager cluster Medisch Ondersteunend en Poliklinieken y ultimo como Manager Business Development.
Sigur cu señora Rodriguez su conocemento y amplio experiencia den cuido den diferente funcion, su experiencia den maneho di personal y su afinidad financiero lo duna un bon contribucion na OE AZV den realisacion di un cuido accesibel, di bon calidad, eficaz y pagabel.
Cu e nombramento aki e constelacion di e team di maneho di OE AZV ta consisti di e siguiente personanan entrante 1 di januari 2024: mr. Cristina Rademaker, ta hefe asuntonan huridico, na mes momento reemplasante di director. drs. Olga Rodriguez, manager division cuido. Roccini Anthony RA, manager division financiero. ir. Edwin Jacobs, director.
