ORANJESTAD (AAN): E intento di Domino’s Pizza pa conquista e pais di Pizza no a sali bon.
Apenas 7 aña despues cu nan a cuminza opera na Italia (2015), e famoso marca Mericano ya caba a hay’e obliga na cera 27 sucursal cu ta situa den parti nort y centro di e pais. Y aunke e compania mes no a informa nada oficialmente, ta parce cu tin un crisis y nan lo bay bandona e mercado, pasobra parce cu publico ta prefera e recetanan clasico.
Nan intento di haya confianza di consumidornan Italiano tabata uno riesgoso for di ora cu nan a cuminza opera, pasobra e sociedad encarga di opera e franchise na e pais, esta ‘ePizza Spa’, a busca financiamento grandi pa financia e 800 tiendanan cu nan tabatin planea pa habri te cu 2030.
Aunbke riba social media, e franchise a bisa cu nan lo bin bek pronto, prensa na Italia a cuminza duda riba e regreso ey, pasobra e compania a busca proteccion di un ley di reorganizacion pa evita cu su mas di 600 creditornan ta busca nan placa como pago.
Loke a pasa: E fracaso a cuminza ora cu pandemia di 2020 a yega, y esaki ta e momento cu tur e otro pizzerianan chikito a intensifica e servicio di entrega na cas, y asina a kita e mercado cu Domino’s tabatin. Pasobra e asunto di entrega tabata e unico balor agrega cu Domino’s tabatin te cu e ora ey na e pais di pizza y spaghetti.
Durante e pandemia, e competencia a bira fuerte, specialmente ora otro negoshinan a cuminza introduci App pa delivery, y esaki a yuda demas pizzeria y restaurantnan haya entrega sin cu nan a haci inversion costoso riba vehiculo pa haci entrega na cas. Y ora Domino’s a cuminza perde e mercado ey di haci entrega di porta pa porta, e decadencia tabata inevitable.
Domino’s pesey a reduci su operacion desde 2020, y dia 29 di Juli 2022 nan a stop e pedida pa delivery na cas via nan website. Segun e resultadonan financiero, e cadena tabatin un debe di 10.6 miyon Euro.
Esnan cu sa di e tema ta bisa cu e Italianonan ta hopi fiel na nan raiznan, y ta mantene fieldad grandi na nan recetanan original. Den caso di pizza, su preparacion ta un rituo dificil di iguala, compara cu un produccion den serie, cu aunke e ta goza di aceptacion rond mundo, e no ta suficiente pa satisface e sabor di e Italianonan.
Prensa na Italia ta mira cu esaki lo bay ta un golpi pa Domino’s, cu ta un marca global cu mas di 10.400 empleado. Na 2022 nan ingreso tabata di 4.117 miyon Dollar, y tabatin un ganashi neto di 491 miyon Dollar, y ta keto bay un di e companianan mas fuerte den area di fast food delivery.
