DEN HAAG: Riba 16 di Maart 2022 lo tuma lugar na Hulanda atrobe eleccion pa Gemeenteraad.
E conocido DJ Chuckie ta participando tambe. E ta aparece riba e ultimo puesto di Partido ‘Hart voor Den Haag’. E puesto ey na Hulandes ta conoci como ‘lijstduwer’.
E DJ naci na Suriname, cu oficialmente su nomber ta Clyde Narain, a bisa cu durante henter su carera di produci musica, el a stipula cu nunca e lo duna declaracionnan politico.
“Pero esaki ta diferente, ta trata di Den Haag. Ta hacimi dolor pa mira con poco a keda atras na e ciudad aki pa e bida nocturno y espectaculo”, el a skirbi riba e website di e partido ‘Hart voor Den Haag’.
DJ Chuckie, kende na 2013 a wordo condecora door di Gobierno di Suriname como ‘Commandeur in de Ere Orde van de Gele Ster’, kier dedica su atencion awor na e bida nocturno di e ciudad unda el a cuminza su carera.
El a subraya cu e no ta bay dedica su mes na politica, sino e ta aparece como ‘lijstduwer’ na number 48 di e lista di candidato di e Partido.
Na Hulanda, ta costumber cu e ultimo number di Partido ta wordo ocupa pa un persona famoso, y pesey ta yame e ‘lijstduwer’.
E potret aki di DJ Chuckie ta saca na September 2013 durante Electric Festival na Aruba.
