CASTRIES: Tabatin un monton di grito di protesta, grito di ‘buu’, y generalmente rechazo di publico ora cu a anuncia e ganador di e Calypso Monarch nacional den oranan laat di Diadomingo marduga, dos siman pasa.
Loke a parce di ta un decision cu ta nada popular cerca fanaticonan, a resulta tambe den intercambio di mokete entre musiconan patras di escenario, unda Polisnan di St. Lucia mester a core bay interveni tambe.
E competencia nacional di Calypso Monarch cu a ser teni na Sab na Vigie dos siman pasa, a conta cu diez participante. Entre nan tin siete ex-monarca, y dos finalista nobo. Dos competidor femenino tambe tabata participando.
E finalistanan ta ex-monarcanan Dezral, Educator, Herb Black, Menel, TC Brown, y Ti Caro. E nobonan ta Gamtion y Mica, como tambe Solange. E monarca di Calypso defendiendo su corona tabata Ti Blacks.
Hopi experto a declara di comienso caba cu e competencia ta demasiado nek cu nek. Sinembargo, e dama Menel kende tabata haciendo un comeback e aña aki a lanta e pasion di fanaticonan di Calypso cu e cancion “Diary of a Woman”. Gamtion tambe tabata uno fuerte cu a impacta fuerte cu su dos cancionnan ‘White Lady’ y ‘Clone Them’, mientras cu Herb Blackun biaha mas a haya sosten di fanaticonan presente, ya fo’i su prome presentacion.
Na final, Dezral (yiu di ex-Calypsonian ‘The Mighty Pep’) a sali na top cu total di 785 punto cu su cancionnan ‘De Big Guns’ y ‘Looking for Fish’. El a haya 49 punto mas cu esun cu a sali runnerup, TC Brown cu a haya 736 punto. Na di tercer lugar tin e dama Menel cu 734 punto, y di cuatro lugar Herb Black cu 733 punto. E resultadonan a wordo anuncia despues di 2:00 am.
Loke publico ta furioso cune, ta e diferencia den punto entre e ganador y e prome runner-up, y tambe e hecho cu Gumption ni Ti Blacks no a sali den puntuahe mes.
