Proceso formacion Gabinete ta expone asuntonan pendiente di gobernacion - *DIARIO ta en espera di nan regreso y confrontacion cu Utilities na Augustus - *Manera DIARIO a splica proyectonan Eagle y Quanten ta pasa pa Gabinete nobo
ORANJESTAD (AAN) — E proceso di formacion pa cual Formador Evelyn Wever-Croes a dicidi na 2021, a nifica un apertura enorme pa casonan cu Gobierno a y ta atende.
E participacion total di comunidad y di prensa na e proceso pa yega na un gobierno nobo, a duna oportunidad pa cantidad di asunto haya atencion publico manera e desaroyonan di Eagle LNG y Quanten cu DIARIO semper a sigui pa informa Aruba.
Despues di a papia ayera cu Formador Evelyn Wever-Croes, tabata e Ir. Richard Eman di Utilities Aruba N.V. cu a papia di desaroyonan na WEB, cu tin tur atencion di DIARIO cu basta dia pasa a mustra Aruba cu e proyecto di Eagle pa gas pa WEB a wordo tranca.
Tabata na forma exclusivo cu DIARIO a presenta na Aruba un carta cu Utilities a manda pa dos manager di WEB, cu ta wordo informa cu nan lo haya nan retiro a base di un serie di acusacion contra nan.
Den e carta aki tambe a bini e confirmacion cu nan a tranca e acuerdo cu Aruba mester a alcansa cu Eagle LNG pa entrega di gas como combustibel pa WEB cu un prijs preferencial cu lo a permiti pa baha e prijs di awa na aruba.
DIARIO a mustra cu WEB tin e ekipo pa traha a base di gas, cu Aruba por haya na prijs barata di Eagle LNG, cu a presenta na Aruba tambe e proyecto di un compania cu lo distribui gas den region di Caribe caminda gas como combustibel tin un interes enorme, manera a base di documentonan oficial di Merca, DIARIO a trece dilanti.
Despues di e encuentro cu Formador ayera, e representante di Utilities a mustra con gerencia di WEB a tranca e negociacion cu Eagle LNG.
Pa DIARIO e pregunta grandi ta keda kico ta pasa despues cu e mes directornan di WEB a trece dilanti den un declaracion cu nan a emiti cu a base di e acuerdo cu Gobierno tin cu Eagle LNG, nan no ta negocia cu otro companianan pa haya gas pa WEB. Mientrastanto si Eagle bisa cu e no ta interesa pa entrega gas mas na Aruba a base di e forma cu a tranca e negociacionnan, mester bini otro compania manera a wordo afirma tambe ayera.
Utilities mientrastanto ta laga asunto di Quanten y e proyecto Eagle LNG pa distribui gas na Prome Ministro Wever-Croes. For di Mei DIARIO a informa Aruba cu e dos proyectonan aki ta wordo pasa pa e Gabinete nobo, cu mester asumi poder despues di eleccion y por a nota cu durante eleccion Prome Ministro Wever-Croes no a uza e dos proyectonan aki como propaganda politico.
Tur informacion cu DIARIO tin te awor ta indica cu e dos proyectonan ta bibo, pero e entrega di gas dor di Eagle LNG na un prijs preferencial cu segun Utilities ta na duda, mientras por spera si cu na Augustus e dos gerentenan di WEB lo mester presenta na un reunion caminda nan mester atende nan retiro.
