*Nan ta purbando esaki aworaki
ORANJESTAD (AAN) – Director di EPB-Oranjestad, meneer Erwin Lopez, a señala den entrevista cu Matutino DIARIO, cu e percepcion robes cu tin di EPB ta di e mayornan. Ta nan tin e problema.
“Nan ta bisa bo flat ‘no mi no ta manda yiu na EPB, mi ta mand’e MAVO. Please mayornan, no haci bo yiu esey, pasobra bo ta pone un mucha bay un scol cu e no ta p’e. Hopi di nos EPBnan ta muchanan hopi mas practico, akinan e muchanan ta haya nan ofishi hopi mas lihe.
“Hopi di e muchanan aki kier haci un ofishi, na MAVO ta great si bo kier bay HAVO, bo ta haci EPB, bo ta sigui bay Colegio EPI. Esnan cu caba MAVO tambe por bay EPI, no ma cu na EPB bo tin prioridad aworaki, pasobra den ley ta poni cu un mucha di EPB tin vorrang riba un mucha di MAVO, pasobra el a cuminza den e parti di ofishi caba” Meneer Lopez a señala.
Meneer Lopez a señala cu nan ta desea di cambia e imagen di EPB, y nan ta purbando aworaki di traha cu comercio; por ehemplo, ATA y AHATA a acerca EPB, vooral AHATA pasobra nan mester di hopi trahado.
“Nos ta desea di traha hunto cu nan, mas pa promove e scol, pasobra mi ta bisa cu e scol ta bon hopi mayor no ta kere mi. ‘Abo ta director di scol bo ta purba gaba e scol’ pero no ta nos ta bisa cu e scol ta bon, ora nos muchanan ta caba scol tin 100% sigur cu nan ta haya trabao, vooral den e sector di Horeca. Tin muchanan cu nos tin cu bringa cu nan pa nan caba scol, pasobra ora nan ta core stage nan kier keda traha. Pero nan tin cu bin bek pa nan haya e diploma pasobra sin diploma, mañan bo no por sigui dilanti”, director di EPB, Erwin Lopez a remarca.
