Segun Edward Maduro, presidente di SADA:
*Tin cosnan cu e mester a wak “long time ago”
ORANJESTAD (AAN)— Lider di Sindicato di Aduana (SADA), Edward Maduro, den entrevista cu DIARIO a comenta cu el a tuma nota di e declaracion di Minister di Finanzas, Geoffrey Wever, y loke el a trece dilanti ta asuntonan cu e sindicato tin añanan caba ta señalando.
Maduro a bisa cu e minister ta, recientemente, a wordo asigna como Minister di Finanzas, pero esey no ta kita afo cu den diferente reunion nan a haci diferente señalamento caba, no solamente pa loke ta trata un grupo di aspirante nobo unda cu e opleidingnan cu tin ta necesario, pasobra no por tuma hende awe den dienst anto nan ta bay traha mañan den e departamento cu ta atende cu container. Esey ta un opleiding y un proceso cu tin un rango tambe mara na dje, cu mester planea di añanan anterior.
“Akinan bo ta wak e falta di vision y incapacidad di e director, pasobra ta cosnan cu mester a wak di ‘long time ago’. E director tin dies aña, segun mi, sinta eynan, pero nos no a wak ningun tipo di movecion akinan. Eynan ta caminda cu nos ta bisa cu ta di lamenta, pasobra nos a tuma nota cu ora di reunion cu e brokernan unda nos a haya sa e diferente ‘feedback program’ via nos coleganan miembro, cu ta bisa cu nan a señala esaki, unda cu e personal ta hunga un rol hopi importante, den e aspecto di haci containernan liber”, Maduro a señala.
El a agrega cu Aduana tin un problema di personal aworaki, cu no por wordo soluciona facilmente, den e siguiente dos pa tres aña, alomenos cu bo tin un vision y ta apto y tin e grandeza di bisa cu mester haci cierto movecionnan cu ta bay encera cu ta pone placa accesible.
Maduro a señala cu e director por maneha e dienst, pero si e ta bisa cu e tin solamente 15 hende so den e seccion eynan y e no ta percura pa busca den e otro seccionnan pa bin yuda ora cu ta mas druk, manera antes, e ora ey e ta sinta cu e problema.
