ORANJESTAD (AAN): Fauna di Aruba tambe ta hopi rico y varia. Directie Natuur en Mileu a publica algun informacion importante tocante Yuwana.
Yuwana (Iguana iguana) ta reconoci na e cuero cu ta colga bou nan garganta, tambe yama papada y na Hulandes ta yam’e ‘wam’. E scama riba nan couchi ta otro caracteristica di e yuwana aki.
Yuwananan no ta haci zonido, pero nan ta comunica door di move nan cabes. Riba nan lomba tin un kam den forma fraña cu ta core di cabes te na nan rabo. E bestia ta bira entre 150 y 200 centimeter.
Su color ta un variacion di berde, di shinishi berde p’e adultonan y un berde mas bibo pa esunnan jong. Tambe nan color di berde ta varia dependiendo di nan emocion, temperatura, salud, ambiente y otro cos.
Durante temporada di reproduccion, e color di e yuwana macho ta cambia. Nan ta bira poco mas berde cla y ta haya un tint oraño cerca di nan pata.
E embranan ta pone 20 pa 70 webo den un hol den tera. E cayente di solo ta broei e webonan. E yuwananan embra ta pone webo solamente un biaha pa aña. Yuwana ta hopi lihe. Y cu nan forsa den nan patanan, nan por subi cadushinan halto. Tambe nan por landa y sambuya.
Cu nan rabo nan por defende nan mes pero nan por morde tambe. Nan cuminda preferi ta fruta y blachinan di mata.
Hende ta e menasa mas grandi p’e yuwananan pasobra hende ta busca nan pa mata. Na Aruba ta prohibi pa mata of tene esakinan captura.
