Premier Evelyn Wever-Croes:
ORANJESTAD (AAN) – Refiriendo ainda na Departamento di Infrastructura y Planificacion (DIP), Minister Presidente encarga tambe cu e cartera di Infrastructura, den entrevista cu DIARIO a agrega cu DIP ta inventarizando cual ta e terenonan cu ta bay desaroya.
“Mi ta papiando awo di, por ehemplo, un tereno cu tin den un caya unda por ta tin cinco cas y dos block bashi. Anto, eseynan ta e promenan cu nos ta bay ofrece. Tambe nos tambe ta interesa pa sa cual ta e terenonan di gobierno pa desaroya, pa por construi vivienda, anto por yama mas hende ainda pa wak si nan ta sigui interesa, pasobra tin hendenan di 2014 cu no ta interesa pa nan por bin na remarca. Esey ta locual nos ta haciendo”, e dignatario a señala.
El a agrega cu ta yena un momento tambe cu tin esnan cu a haya un tereno, pero nunca a construi riba dje, y nos tin cu kit’e for di nan. “Pasobra e terenonan ey ta pa traha cas, asina ta regla den ley. E ta tambe un procedure cu nos ta bay cana pa nos tin mas tereno pa nos por duna hende. Un bez cu nos tin bista cu tin tereno, nos lo yama hopi hende aden, atrobe, pa residencial”, Minister Presidente a duna di conoce.
E mandatario a sigui splica cu pa comercial tabata tin 200 pa 300 peticion haci, cu aworaki ta wordo mira riba e condicionnan cu tin mester, y si e terenonan ta apto pa proyectonan comercial, pasobra manera ta conoci nos tin un ROPV (Ley di Organizacion Teritorial) cu a reparti Aruba den areanan pa destinacionnan.
“Bo tin algun area cu ta naturaleza completo, completamente reserva y proteha pa naturaleza, despues tin un area cu ta “Nature & Landscape” cu ta un combinacion. Bo por tin un cas eynan pero 30% so di bo tereno mester ta construi y 70% mester keda pa naturaleza. Esey ta e terenonan cu ta mas cerca di parke. Den total Aruba tin mas di 50% di nos propiedad cu ta proteha pa ley, y den e otro 50% tin e parti cu ta indica unda bo por haci actividad comercial”, e mandatario a bisa.
El a agrega cu tin hende cu a pidi pa cambia nan cas den un tienda, pero esey no por, conforme ley mas, si e cas ta den area di vivienda; e ora ey no por otorga permiso pa construi algo comercial eynan pasobra simplemente e ley no ta permiti mas.
“E situacion ta dificil, pero nos ta trahando si den prepara mas tereno, manera Watty Vos Boulevard, cu ta un boulevard grandi, tin areanan identifica rond di dje cu ta pa comercio, eynan lo wordo desaroya, y esnan cu a pidi pa uso comercial, por haya eynan”, Minister Presidente a indica. Finalmente el a comenta cu tin cosnan cu tin retraso mas manera “precario”.
