Otmar Oduber ta señala:
ORANJESTAD (AAN) -- Den e rueda di prensa aki, ex-minister di infrastructura Otmar Oduber a expresa cu un dolor cu ta biba den pueblo y cu e mes a sinti durante e ultimo añanan ta cu, cu ken cu e ta topa cu ne, como ex-minister, ta confronta cu kitamento di tereno otorga durante su ministerio.
“Esaki ta e hortamento di tereno cu ta tumando lugar na e momentonan aki di parti di DIP, for di nos conciudadanonan y di nos comerciantenan na Aruba. Y ami ta bis’e na un manera fuerte: hortamento! Pasobra loke DIP ta haciendo, no ta normal den un comunidad civico”, Oduber a bisa.
Esaki, el a señala, DIP ta haciendo pa casi cinco aña cu Aruba su economia: Tin’e paraliza, den coma, pasobra nada ta saliendo for di e Departamento aki, e curazon di e economia cu paisnan ta uza internacionalmente; e construccion como un di e pilarnan pa por fortifica y pusha e economia, na Aruba tin cinco aña para. Asina Otmar Oduber a señala.
“E ta frozen y nos no ta scucha cu e fervor necesario nos miembronan di Parlamento. Mi ta duna reconocemento na un of dos parlamentario cu a haci pregunta, claro nan ta na e parti di coalicion di gobierno”, Oduber a subraya.
Pero cinco aña no ta un par di luna, el a señala. “E excusa di cu pasobra investigacion ta tuma lugar den DIP, si of no, Otmar tabata minister di infrastructura, caminda cu DIP completo tabata bao investigacion e tempo ey, door di e ex-minister di mesun cartera, y nos a saca mas di 2.600 tereno pa traha cas pa nos conciudadanonan. Nos a saca tereno pa comerciantenan cu tabata tin añanan ta wardando”, Oduber a bisa.
El a enfatiza cu e excuse cu pasobra tin investigacion andando DIP no por funciona, e fly ey no ta subi mas.
“Y pakico hortamento di tereno? Pasobra DIP na e momentonan aki ta perhudica e comunidad di Aruba. Personanan cu a warda pa añanan (15-20) cu a haya un tereno for di DIP bao di e minister anterior di infrastructura, pues di mi persona, a wordo tuma den beslag door di señora Marisol Lopez-Tromp; un cantidad di terenonan cu a wordo otorga e tempo ey, conforme tur regla y conforme tur ley. Awo tin un investigacion riba Flamingo tambe, cu no ta involucra nada cu a bay algo robes den DIP, pa loke ta trata terenonan cu a wordo otorga”, Oduber a declara.
El a remarca cu desde cu Minister Marisol Lopez Tromp tabata minister, a horta for di e comunidad di Aruba, e oportunidad pa por a haya nan tereno y ta trata di centenares di persona cu despues di a warda añanan pa haya un pida tereno pa traha nan cas y a haya financiamento di banconan pa nan por a continua e ruta, simplemente a wordo obstaculiza y prohibi sigui dilanti. Esaki a sosode na 2020 y awo nos ta na 2024, Oduber a recalca, y e ta puntra si a dura 4 aña pa sa si na e personanan aki por a otorga nan, nan tereno?
