Directora di DIMP, Luenne Gomes-Pieters:
- Cu ta bay vence dia 9 di October venidero
ORANJESTAD (AAN) Luenne Gomes-Pieters, directora di Departamento di Impuesto, den e contexto di su entrevista cu DIARIO, a sigui bisa cu enberdad, DIMP tin cierto acuerdonan cu Hulanda, a base di e Landspakket pa reformanan fiscal.
Pero e operacion di DIMP ta den man di Directie y conhuntamente cu Minister di Finanzas. “Hulanda no por bin bisa con nos ta maneha e departamento, Pero si nos tin trayectonan andando cu reformanan fiscal cu a caba di pasa, nos por bisa. Y tambe nos ta duna cuenta, con nos ta maneha e departamento, y nos ta riba e bon caminda. Si nos wak e retrasonan cu nos tabata tin den procesamento di restitucion”, Gomes-Pieters a bisa.
El a duna di conoce cu aworaki nan ta den e proceso di restitucion di 2023, pa e contribuyentenan cu a cuminza entrega nan formularionan di inkomstenbelastin 2023, cu ta bay vence dia 9 di October venidero. “Pero segun cu nan drenta nos ta registra y procesa nan, e contribuyente ta haya nan restitucion den seis siman di tempo cu nan ta entrega nan formulario. Un di e puntonan cu si a keda punto di atencion y cu nos ta trahando hopi riba dje, ta e cantidad di cartanan di obhecion, cu tin pendiente cerca.
Pues eynan, nos a haya enberdad ayudo financiero di Hulanda, pero cu un ekipo local caminda cu nos a subi mercado, y nos a habri vacaturanan pa nos mesun yiunan di tera cu a caba un HBO, Universidad di Aruba na Facultad di FEF; nan ta forma parti di un ekipo cu ta dunando, bo por bisa, asistencia e funcionario publico cu tambe ta trahando riba e cartanan di obhecion. Mi ta wak cu e ta bayendo na un speed hopi halto.
Nos a caba di saca cuater vacatura mas pasobra nos tin lugar pa diez. Nos a cuminza cu seis hende, y e fondonan cu nos ta haya ta duna nos espacio pa diez, pues nos kier yena e espacio pa nos haci uso maximo di e financiamento aki, cu ta un proyecto di tres aña. Den tres aña nos ta den control tambe di e cartanan di obhecion”, directora di DIMP, Luenne Gomes-Pieters a duna di conoce.
