Meverly Romano, PR:
ORANJESTAD (AAN) – Den pasado Departamento di Impuesto (DIMP) tabata organiza un campaña pa yuda contribuyentenan pa yena nan aangifte di Inkomstenbelasting, pero esaki a stop, pues no ta tuma lugar mas.
Den entrevista cu señora Meverly Romano, Relacionista Publico di DIMP, el a splica cual ta e motibo cu a stop cu e servicio importante aki.
“Enberdad nos a brinda e servicio aki pa hopi aña, nos tabata yuda tur persona cu tabata tin necesidad, na esnan cu tabata tin entrada relativamente abao, nos tabata yuda nan yena nan formulario. Ultimamente nos no por hacie mas, pasobra e cantidad di contribuyentenan cu nos tin a aumenta masha hopi, e cantidad di personal cu nos tin ta limita y nan tambe tin nan trabaonan diario, y esey ta un motibo pakico nos lo no por sigui cu e servicio aki”, señora Romano a menciona.
Romano a expresa cu DIMP tin tur comprension pa e personanan cu mester di ayudo pa yena nan formulario y DIMP ta purba di yuda na unda cu por, por ehemplo cu preguntanan cu ta drenta sea via telefon of facebook. Nan ta purba di contesta tur e preguntanan pa toch cu e yuda cu e contribuyente tin mester, p’asina cumpli cu e deber cu e tin pa entrega su formulario di Inkomstenbelasting.
“Nos ta yuda si, den otro forma, pero manera nos tabata hacie antes esey no ta e caso mas”, Meverly Romano a reitera.
Romano a splica cu DIMP ta guia tur e personanan grandi cu ta yega na e departamento, cu sea nan famia ta yuda nan yene pero toch nan kier ta sigur si ta bon of no. “Ora cu nan yega akinan nos ta yuda nan den un di e cambernan cu nos tin separa, y nos ta keda yuda nan. Pero e campaña cu nos tabata organiza antes, esey no ta e caso mas”, Meverly Romano a subraya.
Ultimo fecha di entrega ta 9 di December 2024:
E formulario aki a wordo entrega cu fecha oficial di 9 di Augustus 2024, pa ley e contribuyente ta haya dos luna pa yene y entregue. E ora ey e prome deadline ta 9 di October proximo, pero automaticamente DIMP ta duna dos luna mas pa esnan cu no ta logra entrega su declaracion di impuesto dia 9 di October. “Nan ta haya e ora te dia 9 di December pa entrega e formulario y despues di dia 9 di December si, no tin mas extension di termino. Por bisa cu e personanan ta haya cuater luna; dos luna pa ley y dos luna DIMP pa nan por completa e formulario, y entregue na tempo. Esey ta hopi importante”, Meverly Romano a señala.
