Luanne Gomes-Pietersz, Directora
*Procesonan ta den plan pa wordo digitalisa
ORANJESTAD (AAN): Directora di Departamento di Impuesto (DIMP), Luanne Gomes-Pietersz, ta masha satisfecho cu por fin despues di basta aña DIMP a logra atende cu e retraso cu tabata tin den loke ta restitucion.
El a agrega cu esaki tabata un trabao basta grandi cu DIMP a haci cu e funcionarionan cu nan tin banda di atende cu 'compliance', cobransa, areglonan di pago, beslag, servicio, etc cu ta forma parti di nan pakete di trabao, pero ta un trabao cu a wordo haci segun normanan stipula, dianan di presion, reunionnan unda tin cu mantene e ritmo di trabao sino ta cay atras atrobe.
Segun e directora di DIMP awor e trabao grandi ta pa mantene e volumen di trabao pa no cay bek den un retraso den procesamento di restitucion. DIMP kier ofrece e formulario aki den forma digital, sino ta den 2024 of 2025, dependiendo si ta haya placa pa inversion.
Falta ainda pa digitalisa e formulario di Inkomstenbelasting, Winstbelasting y tambe kier digitalisa nan plataforma un tiki mas of duna extra servicio riba e plataforma di Bo Impuesto (Boi) caminda cu e contribuyente mes por yena su areglo di pago, a señala.
Tin tecnologia disponibel caminda e plataforma cu ta uzando caba pa loonbelasting, BBO tin e posibilidad cu e contribuyente mes ta mira su cobransanan den e sistema y e mes por yena un areglo di pago di 6 luna of 8 luna. DIMP mes lo stipula kico ta e areglonan cu por bay automaticamente y si kier un areglo mas largo, di 24 luna por ehempel, e ora si tin cu tuma contacto cu un funcionario di DIMP cu lo evalua e capacidad di pago, etc, Luanne Gomes-Pietersz a duna di conoce.
