Continuacion di recuperacion ta exigi cooperacion di tur gremio
- Aruba a logra yega na e cabez di cero y mester evita otro caida
- Logro actual di Gobierno ta cu por paga debe y crea reserva
ORANJESTAD (AAN) Ora un persona, un organisacion of pais mester sobrevivi un crisis, e mester haci un salto.
Kico esaki ta encera por a mira den practica den e periodo despues di Covid-19, ora mester a reanima economia mundial, cu pa hende por a sobrebibi e pandemia, mester a deshaci di loke ta produci placa.
Na Aruba esaki tabata sumamente visto, pasobra Aruba mester a cera porta di su economia. Gobierno, cu ta maneha e caha di placa di e pais, no tabata ricibi entrada mas pero mester a duna e comunidad placa, pa evita un desastre social, economico y financiero total.
Despues di Covid-19 a cuminsa cu e recuperacion den cual, Gobierno mester a hiba un maneho den cual mester a baha gasto di comunidad pero na mes momento subi entrada di e pais, pa asina e sistema comercial cu ta base di e economia productivo, por a conduci na entrada pa e poblacion y finalmente na loke awor Aruba a alcansa, cu ta un situacion di recuperacion cu por permiti yudansa na gruponan di ciudadanonan cu no por mehora nan entrada sin participacion di e fondo publico, pues asistencia di Gobierno.
Gobierno di Reino a elogia e maneho cu a wordo hiba dor di Gabinete Wever-Croes cu ta drenta historia como un gobernacion ehemplar cu un maneho basico y sigur financiero, cu a conduci na un exito grandi no pa e Ministronan, pero pa e comunidad cu nan mester sirbi pues cu ta beneficia di nan trabou.
Awor, sinembargo, Aruba ta yega na un punto, cu ta papia di stabilisacion, cu ta nifica normalisacion.
Esaki ta produci e pregunta kico ta normal segun e exigencianan di un gobernacion democratico, na interes di e Pueblo y e pais.
E hecho cu Aruba tin un debe di e tamaño actual, no tabata solamente pa motibo di Covid-19, cu a topa cu un Aruba cu un debe nacional enorme.
Ora Aruba a wordo confronta cu e desastre di pandemia, ya Aruba tabata cana cu e peso di debe na su pianan, loke tabata stroba progreso di Aruba.
E debe Nacional cu Mike Eman mes a presenta como base di su maneho financiero, a haci cu Aruba no tabata ningun reserva y cu e prestamo pa enfrenta Covid-19, mester tabata mucho mas halto cu si Aruba a sigui e reglanan democratico di bon gobernacion, cu no ta acepta un gobernacion a base di debe.
Despues di e pandemia, Aruba tabata manera un barco cu tabata zink ariba laman, pero cu e medidanan cu a wordo tuma dor di Gobierno Wever-Croes, a permiti alcansa tera firme atrobe.
Medidanan cu mester a tuma a haci un recuperacion financiero y economico posibel ora Aruba tabata hoga y mester a yega tera firme.
Awor na tera firme, cu mas entrada cu gasto, Aruba mester continua cu e bon gobernacion.
Continuacion di un bon maneho ta encera awor, cu e maneho di debe di Mike Eman no ta haya ripiticion.
Aruba por cana normal ariba e caminda di futuro, cu ta encera cu no mester tuma medidanan pisa mas pero tampoco por haci gastonan cu ta exigi mas placa di Pueblo.
Traha dam pa confronta tempo di secura, ta bira e formula pa un maneho cu Aruba mester sigui cu ta a base di continuacion di e maneho actual cu no ta permiti creacion di debe como parti di un mal maneho di placa, manera a socede den pasado.
E exigencianan di continuacion ta bini dilanti tambe den e World Economic Outlook di e Fondo Monetario Internacional, cu ta mustra cu tin crecemento mundial pero cu mester tene cuenta cu factornan cu ta influencia situacionnan mundial.
Aruba mester realiza cu e ta registra un logro den un mundo cu hopi problema.
Na Venezuela, un situacion explosivo ta keda presente mientras Nicolas Maduro, manera DIARIO a pronostica, ta keda na poder.
Na Hulanda e partidonan na mando a bay di acuerdo cu nan ta baha nan gastonan cu 14.7 Miljard Euro, cu ta nifica cu Aruba mester tene na consideracion cu Hulanda mes ta den problema.
Continuacion ta e palabra magico na momento cu Aruba ta soborea e resultadonan di un tremendo maneho financiero cu a wordo hiba dor di Gobierno Wever-Croes, loke lo nifica cu no ta spera mas medida pa aumenta entrada di Gobierno pero tambe cu Gobierno no por aumenta su gastonan sin mas pero mester traha ariba reserva pa e logro alcansa por ta duradero!
Pa a recupera di loke Covid-19 a laga atras mester a dal salto. Awor pa sigui cana mester di e continuacion di e sentido di responsabilidad cu ta dicidi pa maneho di placa di Pueblo.
