Apertura di Aña di Parlamento marca pa bofon di democracia
- Democracia ta yora den e graf di husticia cu ta base di democracia
- Wever-Croes mester bay cas pasobra el a logra loke otro no por logra
ORANJESTAD (AAN) Awe e dia ta yega cu na un forma solemne, Gobernador di Aruba representante di Reino den e sistema di monarquia democratico di Aruba, na nomber di Gobierno di Aruba lo presenta na Parlamento di Aruba, e plannan di Gobierno di Aruba y loke Gobierno a logra.
Ora papia di Gobierno Wever-Croes ta papia di un gobernacion cu ta uza nomber di e dama mr. Evelyn Wever-Croes, cu a percura pa Reino Hulandes for di 2017 ora el a hereda Aruba den estado di bancarota, haya respet pa e pais Aruba, cu no ta desconoci cu loke un partido chikito por haci cu gobernacion di un pais.
Personanan cu conoce e mundo politico ta na haltura, cu hopi bez ta esnan cu ta grita “democracia” conoce y kier atende cu e realidad di democracia.
Awe democracia ta yora den e graf di husticia, cu a muri na momento cu un Gobierno manera e Gobierno di Evelyn Wever-Croes mester bay cas pasobra un partido cu a haya chens di bula den gobierno sin e respaldo real di Pueblo, a manda Gobierno cas.
Kico ta democracia? Mester bolbe splica? No ta bira tempo pa cuminsa bati alarma pa e forma cu democracia ta haci posibel pa situacionnan nobo di dictadura presenta nan mes?
Pakico Gobierno mester bay cas?
Den Parlamento di Aruba dos asiento a bay pa e partido Raiz, cu a yega na un acuerdo cu e partido cu e partido cu a haya mas voto na Aruba, cu ta MEP, cu MEP ta dicidi kende ta bira Presidente di Parlamento.
A resulta awor cu nan no kier e Presidente di Parlamento cu MEP a permiti dirigi Parlamento, cu porfin a conoce algo di orden despues cu DIARIO na cantidad di ocasion a critica e nivel cu tabata tin den Parlamento.
Pero si Misha y Raymond dicidi cu MEP no tin nada di bisa, aunke Raiz mes a bisa cu ta MEP ta dicidi, ta kende ta ningun hende pa habri nan boca mas?
Democracia mester cera boca ora Misha papia di tur e balornan di democracia, pero lubida cu democracia ta exigi derecho pa tur hende.
Awe Aruba ta cera conoci atrobe cu un democracia moderno den cual un Gobierno mester bay cas pasobra Misha y Raymond no ta di acuerdo cu loke MEP, cu ta e partido cu Pueblo a dicidi cu e kier pa dirigi e pais y cu a percura pa henter mundo aplaudi pa Aruba, ta dicidi kende MEP kier pa ta Presidente di Parlamento, cu tin un aspecto cu Misha no ta ataca.
Pakico Misha no ta bisa Benny Sevinger cu e mester keda cas?
Aruba na December mester bay urna electoral pasobra MEP a base di e acuerdo di gobernacion, a haci loke MEP kier y a presenta su candidato cu no a comete ningun infraccion contra ley, manera otro a haci pero a keda den Parlamento.
Pero esey si no ta wordo comenta.
Ora nos scucha loke a baha e Gobierno di Evelyn Wever-Croes, nos mester cuminsa investiga si acaso e democracia di cual Misha y Raymond ta papia, no ta dera bou fondo laman, cu no tin raiz!
Berguenza loke a pasa den Parlamento di Aruba! Democracia realmente ta na peligro ora dos asiento por manda un Gobierno cas!
Pakico Evelyn Wever-Croes a logra loke otro no por logra? E pregunta cu mester contesta pa proximo eleccion.
