Un crusero a hasta huy di Miami pa Bahamas pa evita di wordo tuma den beslag
ORANJESTAD (AAN):: Un crusero cu riba Diasabra cu a pasa mester a yega na final di un siman di vakantie na Miami, a core cambia di ruta y a mobiliza pa Bahamas, den un accion casi similar a-la-pelicula. Esaki a socede despues cu un Huez Mericano a duna OK pa pone beslag riba henter e barco, como parti di un demanda di riba 4 miyon Dollar pa combustible cu no a wordo paga.
Te cu Diaranson anochi, keto bay e crusero Crystal Symphony ta ancra net dilanti e isla di Bimini na Bahamas.
“Nos tur a sinti cu nos a wordo secuestra door di piratanan di luho,” ta loke e pasahero Stephen Heard Fales a publica riba social media.
Algun pasahero a wordo traslada cu ferry pa Port Everglades na Fort Lauderdale. Tabatin algun cu a wordo hiba pa Aeropuerto di Bimini pa haci viahe bek pa Merca. E compania no a bisa cuanto pasahero tabatin abordo, aunke tin algun cu a menciona cifra di 300, y otronan a menciona 700 pasahero. Hecho si ta cu e barco Crystal Symphony tin capacidad pa 848 pasahero.
E barco mester a yega Diasabra na Miami. Pero di ora cu Huez Federal a duna ordo di beslag, ta costumber cu asina cu e barco drenta den awanan teritorial di Merca, cu oficialnan di US Marshall lo subi abordo y ta tuma esaki over.
Na comienzo e pasaheronan no sa mes pakico a cambia ruta di Miami pa bay Bahamas. E compania a bisa cu esaki ta debi na ‘cuestionnan operativo pero no tecnico’. Despues ta via social media nan a bin haya sa di e caso legal.
Na Bahamas, como 50 miembro di tripulacion a baha tambe debi cu nan contract a finaliza. Tin como 400 miembro di tripulacion mas cu no sa ainda ki dia nan tin di baha, of si nan lo sigui traha como empleado.
E compania Peninsula Petroleum Far East a entabla e caso den Corte pa pone beslag riba e barco, pasobra nan tin debe habri. E demanda ta bisa cu Crystal Symphony a haya nan servicio, y awor e demanda ta cu nan no a cumpli cu e contract pa e debe di 4.6 miyon Dollar na combustible.
Crystal Cruises a anuncia recien cu nan lo stop cu nan viahe te cu fin di April.
Ademas di Crystal Symphony, e compania tin dos barco mas cu ta aworaki riba viahe crusero, y e.o. tin Crystal Serenity cu Diasabra awor pa 1:00 pm lo finaliza su viahe na Aruba. (E lo bandona Aruba riba Diadomingo pa 4:30 pm). Tin Crystal Endeavor cu dia 4 di Februari lo finaliza un viahe na Argentina.
Pasaheronan tin di baha di e barco na Aruba, y e compania Crystal Cruises tin di percura pa nan tin pasashi pa bandona e isla. Tin di bay check si acaso e compania tin suficiente placa pa paga pa tur esaki, y cu tur hende haya vuelo.
E problemanan financiero di Crystal Cruises ta bin cu tecnicamente e compania madre di nan, esta Genting Group cu sede na Malaysia ta bancarota. Esaki ta afecta Crystal dramaticamente, como cu e barco ta un subsidiario di Genting, pues nan tambe no tin placa.
Impulsa pa e pandemia global cu ta afecta salud financiero di sectornan di viahe, e situacion economico na Genting Group a empeora masha rapidamente mes. Pesey seis dia pasa, e compania a anuncia cu nan lo stop cu viahe “temporalmente’.
