Jossy Mansur: "Un corant netamente arubiano a nace: E yama DIARIO"
ORANJESTAD (AAN): Na 1980, 41 aña pasa, riba un 3 di November, e prome edicion di DIARIO a subi mercado di Aruba cu un edicion cu a haya un tremendo acogida den pueblo.
E prome noticia riba Front Page e dia ey tabata: 'Gobierno Insular tin pensa di subsidia awa pa e hotelnan'.
AAN: Agencia Arubano di Noticia, a produci un edicion di 16 pagina, e momento ey. Tabata un combinacion di noticianan local, internacional, pero tambe hopi aviso y mensahenan di felicitacion.
E tempo ey, DIARIO a inicia cu un staff di redaccion conforma pa Jossy Mansur (q.e.p.d), Juby Naar, Angel Kirchner, Django Simmons, Richard Tromp, Harry Croes, Pedro Maduro (q.e.p.d),, Toko Winklaar y Robby Burleson (q.e.p.d).
E prome editorial di DIARIO skirbi pa director Jossy Mansur (q.e.p.d.) a mustra con despues di un planificacion, hopi sacrificio y hopi trabao, un corant netamente arubiano a nace: E yama DIARIO "y ta den bo mannan aworaki distinguido lector pa bo huzga su calidad, su contenido y su mensahe.
Ta ABO, como lector, lo dicidi si e lo sigui sali pa hopi tempo pa pueblo Arubiano por sigui conta cu un corant imprimi na Aruba mes. Nos no tin duda cu e lo ta un diario permanente di Aruba, y cu su circulacion lo crece te pasa cualquier otro corant cu a yega di circula ariba nos isla, pasobra di nos parti nos ta dispuesto di ofrece loke nos a acumula durante hopi aña di experiencia trahando den corant y skirbiendo pa diferente medio di comunicacion social: calidad y profesionalismo (...).
No ta nos intencion subi mercado pa competi contra ningun otro diario existente, sino pa crea nos propio circulo di lectornan, nos propio guianan y nos propio manera di relata y traspasa noticianan y opinionnan na nos lectornan (...)
E ta e culminacion di un proyecto cu a surgi pa cumpli cu e anhelo di pueblo Arubiano pa mira un corant na Papiamento imprimi ariba su propio isla (...)".
Asina cu transcurso di tempo, DIARIO a crece y crece, no solamente den cantidad di noticia, pero den cantidad di pagina y di lectornan. E sosten pa DIARIO den pueblo y den comercio ta sublime.
Ta pa e motibo ey cu 41 aña despues DIARIO ta continua como e corant di e pueblo, e corant di Aruba, e corant mas lesa.
E pandemia di COVID-19 mas cu claro a trece hopi incertidumbre na nivel mundial y Aruba no ta e excepcion. Hopi cambio mester a wordo haci pa por sigui subsisti.
Sinembargo, danki na e esfuerso di famia Mansur, staff y personal di DIARIO en general, na e sosten firme di comunidad, comercio y tur esnan cu a bira nos bira fuente di informacion, DIARIO tey awe pa celebra su di 41 aniversario.
DANKI ARUBA!
