ORANJESTAD (AAN): Directiva, comision di Historia & Preservacion, y miembronan di Women’s Club of Aruba (WCA)
cu orguyo ta presenta un exhibicion special marcando asina e comienso di nos di 91 aña di servicio na comunidad.
Durante e aña cu a pasa, di september 2024 te cu september 2025, nan a celebra e di 90 aniversario cu un serie di evento memorabel, proyectonan, y recaudacion di fondo cu a haci nos miembrecia fuerte y a apoya nos comunidad. Cu e mesun entusiasmo y compromiso, nos ta embarca awo den e siguiente capitulo di nos biahe.
Bao di e liderazgo di chairman Omaira Silva, e comision di Historia & Preservacion a traha intensamente den e archivonan pa prepara e exhibicion aki. Aña pasa, riba 18 di september 2024, nos a presenta formalmente nos archivonan original (1934-1960) na Biblioteca Nacional Aruba, Departamento Arubiana/Caribiana. E exhibicion di e aña aki ta traha riba e fundeshi ey door di presenta nos archivonan fiscal y memorianan di cada presidente y su directiva, y documentando hopi proyecto, actividad y evento di nos. E exhibicion aki no solamente ta refleha nos historia rico, pero ta sirbi tambe como un brug pa futuro, ora nos ta cuminsa cu nos di 91 aña.
E exhibicion lo habri oficialmente Diaranson, 17 di September 2025, pa 4:00 p.m.
Nos Miembro Honorario, Señora Hanneke Boekhoudt, hunto cu nos Presidente, Señora Reina Geerman, cu apoyo di Chairman y miembronan di e comision di Historia & Preservacion, lo dirigi e ceremonia. Lo tene e exhibicion na Biblioteca Nacional Aruba, seccion Arubiana situa den George Madurostraat, y e lo keda habri pa publico diahuebs, 18 di September y diabierna, 19 di September durante oranan regular di biblioteca.
Calurosamente nos ta invita tur miembro, ex-presidente, ex miembro, amigo, famia, y publico en general pa bishita e exhibicion y descubri e legado, logronan, y futuro briyante di Women’s Club of Aruba.
