ORANJESTAD (AAN): Kerki Protestant Oranjestad den un esfuerzo pa cuminsa recauda fondo pa drecha nos edificio Grote Kerk ta organiza un tremendo bazaar riba Diahuebs 29 di Mei venidero.
Nan ta cuminsa 10’or di mainta y ta caba 3’or di atardi. Ta bai tin cuminda di Surnam hopi dushi manera Nassi, Bahmi, Roti y snacks Surnam tambe manera Samosa, Sateh y Loempia. Nan ta preparando un bar bon surti. Tambe na e bazaar aki nos ta bai tin na benta un coleccion grandi di paña pa mucha hoben y hende grandi cu nos a ricibi di e compania MNG (Mango) ora cu nan a cera.
Ta bai tin tambe hopi actividad pa e chikitin por participa y tur presente por cumpra ticket pa gana premio den un rifa.
Kerki Protestant na Aruba ta existi mas cu 200 aña y nos tin un di e edificionan mas bieu na Aruba cu ta data di 1846. Henter Aruba ta keda cordialmente invita pa pasa un rato ameno cerca nan riba Dia di Ascencion! Nan ta situa net patras di Renaissance Resort. Entrada pa e evento ta via Klipstraat y entrada ta gratis.
