E ruta for di entrada na Indian Rock Garden te Kibrahacha lo ta cera for di 2’or di atardi
ORANJESTAD (AAN) – William Erasmus, funcionario di seccion di deporte di IBiSA, den conferencia di prensa relaciona cu e proyecto “Barionan Unico” convoca pa CEDE Aruba, den e contexto di “Ban Caya”, a expresa cu un biaha mas nan ta den e proyecto aki hunto cu CEDE Aruba, pero e biaha aki den e bario Piedra Plat.
Erasmus a subraya cu nan ta bezig ta promoviendo proyectonan pa stimula e union di habitantenan den bario, y mas actividad deportivo tambe, unda ta bin cu eventonan pa hende grandi y pa e muchanan y pesey nan ta bin cu e bus waw cu wiel, pa e mucha y hobennan diverti, haci movecion y deporte den e bus.
Ademas, ta pa promove e clubnan y organizacionnan cu tin den e bario, pa e hendenan sa kico tin den dje.
Tin algun actividad cu IBiSA mes ta organizando y entre otro, e parti logistico tambe. Nan ta bay den diferente bario pa mustra e muchanan kico IBiSA ta haciendo cu e bus aki.
Ta bay tin wega di futbol di mucha homber y mucha muher di kleuterschool. Esaki riba yerba y ta bay tin competencia pa 16 team di kleuter: ocho di mucha homber y ocho di mucha muhe. Erasmus a subraya cu e ta bay ta hopi leuk pasobra ta bay lanta interes di hopi hende y nan por wak tur actividad tambe. Apart di esey IBiSA ta bay yuda cu e “water station” cu ta bay tey tambe, y lo yuda cu mas aspecto logistico di diferente actividad.
Tambe e Departamento di Salud lo ta presente y lo tin e bus di salud, cu ta bay pisa e personanan, controla nan presion, etc. Por busca informacion tocante come saludable, kico ta necesario y ki otro actividad tin rond di Aruba cu ta bon pa salud.
William Erasmus a bisa cu esaki ta locual IBiSA ta bay aporta na e biaha aki, y nan ta bay sigui hunto cu CEDE Aruba cu mas proyecto, y sigur cu Ban Caya.
Elsa Krozendijk, Coordinador di e proyectonan di CEDE Aruba, a expresa cu e ta sinti hopi orguyoso di anuncia un biaha mas e Proyecto Ban Caya, awor den su Edicion di Pasco. Esaki pasobra den e temporada di fin di aña aki, e aspecto familiar ta hopi importante, y esaki tambe ta e meta di “Barionan Unico” nan unda cu e intencion ta pa habitantenan bin hunto y sa cu tin camindanan unda cu nan por reuni y asina aki, trece e ambiente familiar, conocemento, haci recreacion y na mesun momento siña mas di loke e bario tin di ofrece, pasobra esaki ta loke e bario ta den su totalidad.
“E bario di Piedra Plat, Paradera, Hooiberg y vecindario, Sero Pita tur ta keda cordialmente invita. Nos sa cu hopi persona habitante di e barionan aki lo bay duna hopi informacion den Ban Caya, cu ta Diadomingo venidero, dia 10 di December”, Krozendijk a indica.
El a agrega cu lo cuminza cera caya for di 2 or di atardi. Pues e personanan cu ta trafica riba e ruta aki ta wordo informa cu caya lo cera for di e entrada di Indian Rock Garden te cu e T-weg cu ta bay te Kibrahacha.
