Jean Jarré Kock, Educador Fisico di SVGA, ta anuncia:
- Ta invita pueblo pa para na banda na Eagle Boardwalk
ORANJESTAD (AAN) Señor Jean Jarré Kock, Educador Fisico na Fundacion pa Personanan cu Discapacidad Aruba (SVGA), den entrevista cu Matutino DIARIO, a anuncia un caminata pa celebra Dia Internacional di Personanan cu Limitacion, cu ta Diaranzon 3 di December proximo.
E caminata mes ta Diasabra awo dia 29 di November, den horario di 4.30 pm pa 6:30 pm.
“E dia aki ta wordo celebra mundialmente, anto nos a pensa pa hacie den forma di caminata, locual nos a haci anteriormente caba pa celebra e dia aki, pero e biaha aki nos ta bay hacie un tiki mas den grandi”, Jean Kock a indica.
El a splica cu no solamente e clientenan di SVGA, y alumnonan di Dun’un Man lo forma parti pero tambe el a invita hopi mas instancia, por ehempel Sonrisa, Brighter of Future Academy, Ambiente Feliz, Ambiente Nobo y Scol Inclusion.
“E actividad aki ta eigenlijk, netamente pa nos personanan na Aruba, cu limitacion. E ta nan dia, nan caminata, pero naturalmente, ora nan bin pa forma parti, mayornan libremente pa participa, y e ta completamente gratis. Bin cu nan yiunan, cana cu nan full e ruta, cu ta cuminza na Alhambra Casino, pa MC Suites, bira bin bek y caba atrobe na Alhambra Casino”, Jean Kock a duna di conoce.
E fundacion kier a motiva pueblo di Aruba pa bin para na banda, ya cu e ta na Eagle Beach Boardwalk, y tin hopi caminda unda por para.
“Pa prome biaha na Aruba, e ta bay ta e caminata mas grandi cu tin pa personanan cu limitacion te cu aworaki. Anto, nos ta motiva pueblo di Aruba pa bin para na banda, motiva nos clientenan, nos alumnonan. Y no ta di nos so, pero tambe di otro instancianan cu ta haciendo un tremendo trabao pa trata y mehora bida di personanan cu limitacion”, Jean Jarré Kock, Educador Fisico di SVGA a señala.
Durante e caminata lo tin diferente stop riba e ruta, pa ricibi donacion di e publico, cu lo bay pa mehora e gimnasio cu e personanan cu limitacion ta haci uso di dje.
