Alyssa Singh ta invita henter comunidad:
*Pa participa den e Hubileo Hubenil di Speranza 2025 na Roma
ORANJESTAD (AAN) — Alyssa Singh, miembro di Stichting Angels and Stars, ta un di e hobennan cu lo bay Italia, Roma, den e Delegacion Hubileo Hubenil di Speranza 2025.
Na Club Caiquetio nan ta organizando un grandioso fundraising riba Dia di Natalicio di Betico Croes, Diasabra 25 di Januari aki, cu, entre otro, lo tin un “kids corner”, ademas tin entretenimento, un tayer yama “Arte Spiritual”, cushina y bar bon surti, y un vlooienmarkt masha grandi, cu ta encera paña, diferente articulo manera buki, y hopi mas.
Alyssa a reitera cu esaki tur tin e meta di recauda fondo pa nan por cubri nan participacion den e Hubileo Hubenil 2025, na Roma.
Esaki ta encera un pakete cu tin un costo di 6 mil florin pa persona, y en total ta 32 persona cu lo forma parti di e delegacion di Aruba.
E hoben a splica cu cada hubileo ta tuma lugar cada 25 aña, y na aña 2000 tabata tin un delegacion di Aruba den e hubileo.
E actividad aki ta for di 10 or di mainta te 4 or di atardi, y nan tin bebida, refresco, snacks, sopi, coi dushi, y yen di cuminda crioyo.
Encuanto e tayer Arte Spiritual, Alyssa cu su colega Ushana lo presenta esaki. Alyssa a splica cu cada persona cu participa lo descubri nan arte spiritualmente.
Pa Alyssa bay Roma lo ta un experiencia masha grandi mes ya cu e ta sosode cada 25 aña. Papa Francisco lo tey tambe, e ta den forma di Roma Catolico, unda nan tur ta bin hunto y nan lo experiencia un evento masha grandi mes, unda e porta di Hubileo ta habri pa nan tur.
