Cu tres orado internacional - ORANJESTAD (AAN) – E abogado di e Federacion di Trahadornan di Aruba (FTA), mr. Jose Figaroa,
tambe a hiba palabra durante e conferencia di prensa unda a anuncia e di 24 Congreso Statutuario di e sindicato.
E Congreso lo cuminza dia 15 di September, manera presidente di FTA a comenta caba, y e ta inicia cu un Conferencia, manera ta usual pa FTA, normalmente, y ta scoge un tema.
Pa e Congreso aki FTA a scoge e tema “Flexibilidad Laboral” mr. Jose Figaroa a menciona.
“E motibo pa cual nos a scoge e tema aki, ta pasobra un di e exigencianan cu nos a wak riba e asina yama ‘Landspakket’, di parti di Hulanda ora el a fia Aruba cierto suma di placa relaciona cu e crisis cu nos tabata tin y tin ainda, ta papia entre otro, di un flexibilizacion di e mercado laboral aki na Aruba.
“Y nos a haya esey un tema interesante pa discuti den e conferencia cu ta bay habri nos congreso, esaki pasobra pa nos como sindicato, como representante di trahado, no ta cien porciento di acuerdo cu e interesnan di e dunadornan di trabao, na unda cu bo ta sinti cu tin un tendencia na un flexibilizacion hopi mas fuerte, di cual nos como sindicato ta dispuesto na papia over di dje.
Pero pa pone esaki den perspectiva nos a dicidi di trece dilanti como un tema, y invita algun orado cu tin experiencia internacionalmente, riba e asunto aki, pa duna nos nan punto di bista con nan ta mira flexibilizacion na un nivel mas halto”, mr. Jose Figaroa a splica.
Pa elabora riba e tema aki FTA a invita señora Maria Elena André, director di e Departamentonan di Asuntonan di Trahado di ILO (International Labor Organization). Figaroa a splica cu señora André lo trece un perspectiva di un nivel hopi halto, y internacional, riba e asunto di flexibilizacion.
Y banda di dje, otro orado invitado ta señor Tuur Elzinga, Presidente di “Federatie Nederlandse Vakwezen” (FNV), cu ta e sindicato di mas grandi di Hulanda; y, como di tres orado ta bin señor Salim Kalkach, cu ta Secretario di Relacionnan Internacional di e Confederacion Revolucionario di Obreronan y Campesino, na Mexico, y tambe e ta forma parti di e Directiva di “Alternativa Democratica Sindical de Las Americas”, cual ta un confederacion di trahadornan na cual tambe FTA ta forma parti di dje y cu ta representa mas of menos 11 miyon di trahador na Latinoamerica, Centroamerica y Caribe.
“Interesante di señor Kalkach cu mi a menciona como ultimo, ta cu e confederacion ta representa den su mayoria, e trahadornan den turismo na Mexico; nos ta papiando di Quintana Roo, Cancun, etc. Nan economia y nan membresia ta hopi similar na loke tin na Aruba, pues ta hopi interesante pa wak su perspectiva na un nivel hopi mas halto riba e tema di flexibilizacion”, mr. Jose Figaroa a señala.
Despues di e presentacion di e oradornan ta bay tin un discusion di panel tocante e tema menciona, pues, pa intercambia un poco di idea over di e perspectivanan cu ta worde treci dilanti.
