Directora señora Lisette Does:
- Nan ta personanan cu demencia na un edad hoben
ORANJESTAD (AAN) Señora Lisette Does, directora di Cas Marie, a expresa den entrevista cu DIARIO cu e ta hopi contento cu dia 1 di Juli venidero, nan di dos pasadia lo habri na Santa Cruz, y nan lo ricibi e prome clientenan.
Señora Does a bisa cu e pasadia aki a logra enberdad, cu ayudo di Minister encarga cu Asunto di Adulto Mayor, y intencion ta bay traha mas cu e grupo meta cu no a acapara ainda, na Cas Marie Savaneta.
“Mi tin cu bisa cu awendia nos tin personanan cu demencia, na un edad mas jong. E drempel ta bira un tiki halto, y ta dificil pa nan yega unda nan mester yega, y ta wak un pasadia manera Cas Marie como un problema, sin pensa cu esey por yuda mantene nan habilidadnan ainda intacto, locual cu e programa cu nos ta ofrece, structura pa guia nan den e dia di pasadia, pa por yuda nan mantene nan mes bon ainda den e demencia”, señora Does a comenta.
El a indica cu nan ta bay ta den nan segundo dependance, den un edificio na Santa Cruz, bario Macuarima, hopi crioyo, anto cu e meta di ricibi e tipo di personanan aki cu demencia na un edad jong.
“Na Macuarima nos ta habri cinco dia y sigur dos di e cinco dianan ey lo bay ta dirigi riba esnan jong, cu ta mas tanto pa yuda nos cushina, haci obranan di man, si nan kier pasa un basora pa yuda den e cas tambe por, por ta guia muchanan di scol den e temporada di vacacion, cu ta bay bin na caminda”, señora Does a splica.
El a menciona cu esaki ta cosnan cu esnan jong ta interesa pa haci. Pa muha mata y planta, tin un bunita green house, hopi moderno segun señora Does a compronde, ya cu e no a mire ainda.
“Kiermen, e persona cu ta bin, ta bin yuda, bin traha, depende con e ta mire den su mundo, y asina nos ta acept’e”, Does a expresa.
El a agrega cu na Cas Marie na Savaneta nan tin e grupo mas grandi, adulto mayor den edad di entre 60 cu 90 (welo cu wela) pero na Aruba nos tin hende cu edad mas hoben cu ya caba tin demencia, señora Does a reitera.
“E dos dianan cu ta bay wordo duna special pa hende jong, ta duna otro cosnan pa haci, otro tipo di actividad. Nos hendenan ta cambia, mentalidad ta cambia, bistimento ta cambia; un hende por tin demencia pero toch ta haya hopi importante pa ta cu makiyahe, renchi orea largo, huña largo, cosnan cu antes nos hendenan grandi no tabata haya importante, anto e ora ey nos tin cu bay cu e tempo ey” Lisette Does a menciona.
