E atentado mas grandi contra interes Arubano tabata debe nacional
*17 di cada 100 Florin ta wordo kita pa loke mal gobernacion a produci
*Cambio di clima y desaroyonan mundial ta exigi maypor inversion
ORANJESTAD (AAN): Na 2020, henter mundo a sufri un colapso financiero na momento cu Covid-19 a ataca. E pandemia no solamente a paralisa bida na planeta tera y exigi hende salba su bida na prome lugar, pero el a mustra dede tambe riba e peor acto di mal gobernacion cu ta abuso di placa di Pueblo dor di gobernantenan.
Pa loke ta trata Aruba directamente, e pandemia Covid-19 na un forma directo a acusa Prome Ministro Mike Eman, cu na 2009 pa por acumula voto di Pueblo, a gaña Aruba cu por crea un debe pa futuro di e pais y paga esaki orguyosamente.
Na 2020, Aruba cu tabata tin tur oportunidad pa despues di su Status Aparte traha riba un bon futuro, na man di e Gobiernonan di Emannan a realisa kico ta nifica gobernacion di fantasia, ora despues cu despues cu Betico Croes a logra Status Aparte, Betico Croes como lider y creador di e concepto di Status Aparte, a wordo traiciona mientras Pueblo di Aruba a cay den trampa di luz di laser berde.
Si Aruba por a enfrenta Hulanda pa pidi su Status Aparte, ta pasobra Aruba a traha riba su plan economico cu na 1986 no tabata solamente Lago cu a bay, pero tambe diverisificacion di turismo den cual celebracion di Aña di Turismo na inicio di decada 80, sigur a duna prueba cu Aruba a lucha pa un Status Aparte den cual solidez economico tabata garantisa.
Cu entrada di Siglo 2021, e sistema di Family and Friends a bira vehiculo pa e gobierno populista di Mike Eman, cu a destrui futuro di Aruba cu a scapa cu e tabata den un constelacion di Status Aparte cu Reino, cu por a interveni y evita cu awe, Aruba ta otro estado den un estado desgracia pa motibo di e maneho gubernamental manera sigur tabata e maneho di Mike Eman.
Con serio e atentado di Gobierno Mike Eman contra bienestar di Aruba tabata, ta bini dilanti den e cifranan di e Comision di Supervision di Reino, Caft, cu mester a wordo introduci na Aruba pa motibo di e herencia di Mike Eman.
Cu entrada di Gobierno Evelyn Wever-Croes, Aruba a subi caminda di un maneho financiero responsabel ora mundo a wordo confronta cu Covid-19 cu a exigi pa reservanan wordo uza pa scapa bida di hende.
Aruba no tabata tin reserva y solamente un debe herencia di Mike Eman cu e mester a aumenta pa asina por a confronta e Pandemia.
Cu Gobiernonan Wever-Croes y sigur e Ministro di Financia Xiomara Maduro a pone Aruba riba e caminda corecto pa atende cu fondo publico, ta bini dilanti den e resultadonan financiero di e pais.
No solamente e pais Aruba mes pero otro instancianan manera AZV y SVb, cu sigur tabata na careda ora Covid-19 a bati na porta pero debi na un bon maneho awe tin un surplus, pues mas entrada cu gasto manera un bon maneho di placa di Pueblo ta exigi.
E comision di supervision financiero di Reino awor ta mustra Aruba cu mester uza e sumanan aki tambe pa baha e gasto di interes di e debenan cu tin dor di baha, pues paga, e debenan.
Segun e informacionnan oficial, e gastonan di interes (pues e placa extra cu mester paga ora ta baha debe) ta representa 17 porciento di e presupuesto.
E informacion aki tin un significacion grandi pasobra e ta duna prueba con e maneho di crea debe, cu Mike Eman orguyosamente pa haya voto na Aruba a uza, ta stroba Pueblo di Aruba di goza completamente di e recuperacion financiero y economico cu el a logra na man di Gobierno Evelyn Wever-Croes.
17 porciento di presupuesto ta dedica na pago na interes di debe. Pues e entrada di placa di Pueblo ta wordo afecta na forma serio dor di pago di e debenan di e pais, despues cu Mike Eman si a haya su salario y hasta por goza di pensioen como ex Ministro Presidente di Aruba y pensioen di Parlamento cu el a acumula durante su bida, den cual politica tabata practicamente continuamente, base di su entrada personal.
E carera politico di Mike Eman ta haci cu e por biba bon financieramente. Pero Pueblo si a keda atras cu e desastre financiero cu el a causa y cu ta wordo aumenta cu gastonan di e pais pa persigui Ministronan y Family and Friends di su partido manera e aventura di Avestrus ta indica.
Awe loke Mike Eman tabata kier pa Aruba ta socede. Aunke Gobierno Wever-Croes a logra mehora e situacion financiero di Aruba, e Pueblo di Aruba no por disfruta na forma total di esaki, pasobra mester paga debe y interes cu ta 17 porciento extra riba debe.
Esaki ta e bolo cu Mike Eman a regala Aruba, cu su partido cu a produci debe, scandal, abuso di posicion, berguensa pa Aruba durante su tempo di gobernacion.
