ORANJESTAD (AAN) – Departamento di Departamento di Impuesto (DIMP), a convoca un conferencia di prensa Diahuebs mainta,
na unda su director Luanne Pietersz a elabora tocante impuesto riba vehiculo di motor, y Grondbelasting.
Pietersz a ilustra un rato con e pago di impuesto di auto a bay riba e prome mitad di aña. Na final di aña pasa Departamento di Impuesto a anuncia cierto cambionan, manera pagonan parcial pa e contribuyentenan cu lo a desea di haci uso di e sistema aki y e funcionario a informa con a bay cu e cumplimento di pago di dicho impuesto.
El menciona e cantidad di autonan cu tin registra, cu ta 88.997. Contribuyentenan cu a paga nan impuesto completo ta 80.4% cu ta 71.529 ciudadano. Luanne Pietersz a expresa cu e ta hopi contento cu esaki, mirando cu e contribuyentenan a cumpli cu nan pago di impuesto, y ta compronde cu nan mester haci esaki na tempo.
Tin un total di 5.204 plachi cu no ta paga. No tin pago at all riba nan y esey ta 17.1%. Plachinan cu ta sin pago ainda ta, A:12.570, DT: 203, MFA (brommer): 466, V: (auto di huur) 1.142.
Director di DIMP a menciona tambe cu tin contribuyentenan cu ta entrega nan plachi, y esnan cu a hacie na tempo pasobra no ta bay haci uso di dje durante 2021, ta 2.264.
E fecha final pa e pago di e di dos mitad di aña pa vehiculonan di motor, cu tabata dia 30 di Juni proximo, pero manera ta conoci, conhuntamente cu Minister di Finanzas e fecha a keda aplaza pa dia 2 di Augustus venidero.
“Naturalmente, nos kier haci un apelacion na e contribuyentenan cu no a paga nada, nada, na impuesto di vehiculo di motor, pa bin haci nan pago pa evita cu nan ta bay haya un cobranza adicional y cu un boet”, Luanne Pietersz a splica.
Luanne Pietersz a agrega cu e pago por sosode na un manera parcial cu a wordo introduci aña pasa. Esaki ta encera cu por paga na Juni, Juli y Augustus 50 florin cada luna, cu ta yega na e suma di e di dos mitad di impuesto cu mester cumpli cune, pa number di auto.
E dama a duna di conoce cu den e prome mitad di aña, Departamento di Impuesto a saca 15.603 cobranza adicional pa contribuyentenan cu no a cumpli, y esaki tur por wordo evita si e contribuyente ta paga na tempo, si haci pagonan parcial y uza e sistemanan cu Belasting tin pa facilita e cliente pa asina aki, no tin nodi haya boet of cobranzanan innecesario.
