Un temporada nobo ta cuminsa pa Aruba awe na momento crucial
*Te awe no ta conoci pakico Raiz mester a comete suicidio politico
*Cu e mihor deseonan pa un futuro cu e coalicion di sorpresa
ORANJESTAD(AAN)—Awe un Gobierno nobo ta tuma asiento na Aruba, lagando atras un pregunta habri for di 2024.
Cu hopi politico ta drenta politica cu e ambicion pa haya puesto den Gobierno ta un hecho conoci.
Pero pakico tabata tin tanto ansia pa Gobierno nobo sinta, te awe ta keda un contesta mas ainda si tuma nota cu e Ministro cu pa e Gobierno nobo lo ta encarga cu placa y produccion di placa den economia, a keda Ministro di e coalicion di MEP, ciu mester bandona Gobierno y Raiz, cu no ta existi realmente mas for di momento cu eleccion a tuma lugar.
Politica di Aruba durante ultimo lunanan, despues di un tempo di maneho di MEP cu a saca Aruba for di e awa bruto cu a keda atras manera tur documento ta demostra, ta drenta un periodo cu ta laga preguntanan serio atras ora ta papia di base democratico.
Ora mira bon e partido mas grandi cu ta AVP a gana eleccion ora su dirigente Mike Eman a anuncia cu e ta “bay bolter cos”, mientras Aruba a drenta e epoca cu Reino a honra e promesa di Mike Eman, cu awe Aruba ta paga pa tur e debe cu el a crea durante gobernacion di Mike Eman.
Na e momento cu el a dicidi cu e ta bay “bolter cos” AVP no tabata tin tanto voto. Pero Mike Eman, cu manera eleccion a mustra a perde popularidad, a pone un hoben number uno mientras e hoben nunca a bira number uno di partido AVP, cu awe ta pone Mike Eman atrobe como Prome Ministro y e hoben cu a percura pa e triunfo di AVP, na ultimo lugar.
E otro parti di victoria di AVP ta basa riba e hecho cu Mike Eman a priminti un aumento di 700 Florin di Penisoen di behez cu ningun momento el a studia, pasobra ta ora a gana eleccion, durante e proceso di formacion, a pidi opinion di e director di AVB.
Por papia pues di un promesa cu no a wordo cumpli, pero nunca tin seguridad ora ta trata di promesa, sigur no di e gobiernonan cu Mike Eman a yega di dirigi.
Pakico Raiz mester a acelera eleccion, sabiendo cu esaki lo ta su morto pasobra Geoffrey Wever a duna tur indicacion cu e ta riba lista di Futuro pero a continua cu desaroyo di proyectonan importante den economia di Aruba, siendo miembro di e partido MEP, cu e no ta sostene mas.
Ayera a bini un fin na temporada di formacion a base di un union di dos dirigente di partido, cu ta Mike Eman y Gerlien Croes, cu a kibra cu otro pero awor a dicidi cu nan por traha cu otro.
En todo caso Aruba a conoce situacionnan nobo, manera pues un Ministro cu tabata Ministro di e partido cu mester a bay cas, a keda Ministro di e partido demisionaroio cu den eleccion a stop di existi y awor cu Gerlien ta miembro di e Gobierno nobo.
E programa di Gobierno awor mester splica con ta bay atende cu placa di Pueblo pero na mes momento ta duna oportunidad pa relaha.
Tin mas pregunta cu ta keda atras. A tuma tanto tempo pa papia di Ministronan, cu tur sector cu mester a papia for di prome cu eleccion.
Awor a yega na un acuerdo, Pero e pregunta ta keda, con e acuerdo aki ta bon refleha den e presupuesto cambia di 2025, cu a desaparece pa despues bolbe aparece. E cifranan cu ta denota placa di Pueblo cu ta wordo cobra y gasta ta e informacion final mas importante, cu Pueblo ta spera awe.
Eleccion ta un asunto di Pueblo. Loke Pueblo dicidi ta wordo acepta. Na final di cuenta ta Pueblo ta dicidi riba su futuro, su destino, felicidad cu e ta dicidi loke e por contene.
Ta resta pues e momento pa deseo Gobierno nobo hopi exito den su futuro y laga na tempo pa duna contesta riba preguntanan cu ta keda atras a base di loke transparencia democratico ta exigi!
