ORANJESTAD (AAN) – Diamars atardi minister di Turismo Dangui Oduber a continua cu su reunionnan den cuadro di gabinete Wever-Croes 2 y e di dos termino di minister Oduber.
Minister Oduber a pone cu e lo ta reuniendo cu tur su CEO nan y directornan cu ta resorta bou di su ministerio. E biaha aki a reuni cu e CEO di Aruba Airport Authority sr. Joost Meijs pa di e forma aki comparti e liña di pensamento, vision y maneho cu minister Oduber ta desea di hiba den e gobernacion 2021-2025 pa cu aeropuerto.
Minister Dangui Oduber a splica sr. Meijs cu su persona lo desea di diversifica nos mercado di turismo na Merca, Latinoamerica y Europa. Minister Oduber ya caba a comparti cu sr. Meijs den pasado e liña di pensamento den cuadro di e diversificacion den e mercado mericano. Ya a yega di papia caba cua ta e estadonan cu lo desea di explora.
Minister Oduber a papia riba e proyecto di “Gateway 2030” cu ta un proyecto hopi importante pa e economia di Aruba. E proyecto aki ta un proyecto di mas di 140 miyon dollar cu lo genera mas cu 200 cupo di trabou sea directo of indirecto cu AAA. E proyecto aki lo crea un spin off economico pa pais Aruba y lo trece placa den caha di Gobierno atraves di impuesto. Ta un proyecto importante pa e ampliacion y renobacion di nos aeropuerto.
Den cuadro di esaki e mandatario a splica sr. Meijs cu un di e aspectonan cu mester wordo inclui ainda den e proyecto “Gateway 2030” den e siguiente fasenan ta e sala di yegada. E sala di yegada no a wordo inclui inicialmente den e proyecto. Hopi ta cambio nan cu ta wordo haci den e proyecto 2030, e sala di yegada ta un di e cambio nan aki cu lo mester bin na turno den future. Minister a menciona cu tur e plannan aki ta wordo discuti na e momento nan aki pero mester bisa cu sr. Meijs tambe ta di acuerdo cu e ponencianan aki.
Un otro punto di atencion tabata e asunto di CBP (proteccion di frontera y aduana di merca), esaki ta wordo atendi riba e nivelnan di mas halto. Caminda cu diplomaticonan di Gobierno mericano y diplomaticonan di Gobierno di Aruba ta purba na yega na palabracionnan pa asina soluciona e problemanan aki, asina e mandatario a trece dilanti.
Tambe a papia riba algun plannan hopi ambicioso cu minister Oduber lo bay comparti conhuntamente cu e CEO di AAA na comunidad di Aruba. Esaki ta tocante di bulamento cu avionnan electrico, pero despues minister Oduber lo duna mas detaye y informacion riba esaki.
Manera ta conoci aña 2020 no tabata un aña facil pa AAA, nan a hiba un perdida hopi grandi di miyones di florin. Esaki a haci cune cu nan mester haci un reorganisacion, pero na e momentonan aki AAA ta un poco mas miho. E proyeccion nan pa aña 2022 ta mustra cu AAA lo recupera bek na 90% den tur entrada den comparacion cu aña 2019.
Minister Dangui Oduber ta hopi optimista cu aña 2022 ta bay ta un bon aña pa AAA y tin hopi gana di sigui traha hunto pa asina logra ehecuta e maneho y vision di gobernacion 2021-2025.
