Minister Ursell Arends ta presenta ‘Trash 2 Cash”
ORANJESTAD (AAN): Durante un conferencia di prensa riba Diamars, Minister di Transporte, Integridad, Naturalesa y Asuntonan di Adulto Mayor, Ursell Arends a elabora riba e proyecto "Trash 2 Cash" Waste Management Solutions, na unda individuo of companianan priva por haci un "pitch" nan ideanan con pa yuda reduci of cambia e destino di desperdicio, pa medio di un video cortico cu mester wordo upload riba website www.trashtocasharuba.org.
Segun e Minister esaki tabata un dia historico, no solamente pa e fecha conoci como 'twosday' pero pa e promesa pa generacionnan di futuro pa haci todo por todo pa Aruba tin su propio economia circular aki 10 aña.
E mandatario a indica cu pa gobierno ta sumamente importante pa mas negoshi explora e balor cu e materialnan procesa di reciclahe por tin, sea pa procesa nan aki of exporta nan pa otro pais, y di e manera aki nan participa na e solucionnan grandi den Aruba su maneho di desperdicio.
El a splica cu deseo di comunidad ta pa cera Parkietenbos y pa yega na un maneho pa recicla, re-usa y reduci desperdicio. "Cada un di nos como ciudadano mester yuda logra e meta aki," e mandatario a enfatiza.
Prome cu reforsa legislacion, mester crea e fundeshi solido den comunidad caminda tin infrastructura y diferente organisacionnan pa procesa tur e diferente tiponan di desperdicio.
Minister Arends tambe a indica cu siman cu a pasa por a mira riba rednan social diferente video unda ta puntra ciudadanonan over kico nan sa di nos desperdicio aki na Aruba. Den un segmento por wak riba pagina social di "Trash 2 Cash" Waste Management Solutions. El a señala cu e meta di esaki ta no solamente informa pero tambe educa comunidad riba diferente tipo di desperdicio, e mihor manera pa procesa esaki y uzo pa e materialnan procesa, cu ya caba varios compania ta haci uso di esaki.
Minister Arends a enfatiza cu ta sumamente importante pa cuida nos naturalesa y medio ambiente, como tambe salud di ciudadanonan den becindario di area di Parkietenbos. El a indica durante e conferencia di prensa cu personal di Serlimar tabata lidia cu un candela y el a gradici y elogia esfuerzonan di trahadornan di Serlimar cu ta pone nan bida den peliger pa atende cu e candelanan aki.
E meta ta pa cera Parkietenbos, elimina tur sushi cu ta yega na Parkietenbos.
