Segun director di ATIA Herrick Henriquez:
ORANJESTAD (AAN)— Scarcedad di trahado pa e cantidad di trabaonan disponibel na Aruba ta algo cu ATIA (Asociacion di Comercio y Industria di Aruba) a premira for di aña 2023 caba.
Asina e director di ATIA, Herrick Henriquez a comenta den entrevista cu DIARIO. El a indica cu aña pasa nan a sinta cu un 'task force', den un reunion tripartite cu sindicato, gremionan y gobierno, con nan por resolve e escasez di trahado cu tin aworaki, cu e mercado ta creciendo pero no tin suficiente empleado.
“DPL su trabao ta pa haci ‘markt toets’. Markt toets den pasado tabata algo hopi importante, pasobra no tabatin trabao pa tur hende. Aworaki tin hopi trabao pa tur hende, y nos ta pensa cu e markt toets awo ta un tiki ‘overboarder’ y vooral pasobra e ta trancando e crecemento di e companianan”, Henriquez a señala.
ATIA a bin compronde di algun di su miembronan cu ora haci un afspraak na DPL, nan ta hay’e despues di dos of tres luna. Despues DPL ta haci markt toets cu ta dura dos luna of mas, y ta sigui pa werk-vergunning cu ta seis of siete luna mas leu, despues e tin cu bay DIMAS cu ta un otro trayecto. Señor Henriquez a menciona cu un di e miembronan di ATIA a yame, bise cu el a haya un vergunning cu a spera 11 luna riba dje, y e luna cu ta bin e permiso aki lo caduca caba. “Pa nos ta hopi importante pa e departamentonan aki cuminza agilisa hopi mas. Nos a compronde por ta cu no tin basta hende trahando, pero nan mester digitalize hopi mas. Manera un departamento di DPL, cu ta un Markt Toets, nos ta pensando cu awo cu tin hopi trabao, mester por duna un ok, y duna afspraak hopi mas lihe, pa yega na e demanda di trabao cu tin, cual ta hopi halto anto ta wordo sintie den tur sector, nos ta bisa cu for di Horeca, pero tin dos hotel grandi cu a caba di habri aunke nan no ta full capacita caba”, director di ATIA a señala.
El a comenta cu loke ta pasa ta cu nan ta keda come di otro. “Tin un ‘canibalismo’ den tur sector, hendenan ta buscando trabao y bo ta wak cu esey ta di un banda bon, pero e por yega tambe na otro problemanan social cu hendenan ta wordo ‘overwork’. E mercado ta uno delicado pasobra e comerciante no por crece manera e kier”, director di ATIA, Herrick Henriquez a señala.
