Presidente di FTA:
ORANJESTAD (AAN): Presidente di FTA Hose Figaroa a confirma cu e nivel di preparacion di hendenan cu caba scol y ta bay traha den hotel, no ta cuadra cu locual tin mester.
“No ta solamente e nivel di preparacion teoretico falta, pero tambe hopi biaha e postura di e hoben cu ta subi e mercado laboral no ta esun mihor”.
Nos mester bay enfoca mas riba con ta prepara e hoben, no solamente den e parti di teoria, pero tambe riba con bo tin cu comporta bo mes como trahador, esta bo responsabilidad pa cu bo trabao y tuma bo trabao na serio.
Cosnan manera yega na tempo y con bo ta trata un bishitante, cu ta cosnan cu no semper bo ta siña den buki, segun Figaroa.
El a sigui bisa cu tur cos ta cuminza na cas, pero e sistema di enseñanza mester yudabo mehora locual mester wordo mehora.
“Nos ta un economia di servicio y den servicio ta importante, e postura cu bo ta tuma na momento cu bo ta trata cu hende”, segun e presidente di FTA.
El a indica cu si bo traha por ehempel den un fabrica di arma telefon y bo tin un cara rabia of tristo, e no lo afecta e trabao cu bo ta haci. Sinembargo ora cu bo tin un trabao unda cu bo tin cu atende cu hende y specificamente turista, e manera con bo ta presenta bo mes ta algo hopi importante.
Segun Figaroa, diferente hotel a indica cu tin varios trahador hoben cu no ta tuma e trabao mucho na serio.
El a splica cu locual semper tabata pone Aruba destaca como pais turistico tabata e trato cu nos hendenan ta brinda na e bishitantenan di otro pais, esta e carisma y e manera special di trata hende.
“Generacionnan bieu tabata mas fuerte den e disciplina laboral y esey mester wordo mehora actualmente”, segun Figaroa.
