ORANJESTAD (AAN) – Parlamentario Marco Berlis, den conferencia di prensa di fraccion di MEP, Diaranzon,
ademas di a elabora riba e mocion cu el a presenta pa introduci integridad den Parlamento, a toca e tema di “nivel politico” den Parlamento.
El a bisa cu hopi hende cu a mira den videonan cu ta circula via medionan social, ta critica e nivel politico den Parlamento.
“Pero mi kier subraya tambe cu ora nos papia di nivel politico, laga nos papia di nivel politico pafo di Parlamento, unda cu mi ta bisa cu ta wordo aplaudi, ora cu tin cierto videonan ta pasando, cierto lenguahe ta wordo uza eyfo y esaki ta entretene”, Berlis a señala.
El a expresa cu ta hopi positivo pa critica e nivel politico den Parlamento, pero tambe pafo. E ta kere cu como parlamentario y como gobernantenan tin cu duna e ehemplo, e postura, e lenguahe, refleha den e funcion. Nan ta un ehemplo pa e pueblo en general y pa e hobennan.
El a bay bek na e tema di integridad, reiterando cu no solamente e ta lamenta e votonan contra su mocion, pero tambe cu nan no a bin cu un solucion, ni un plan tampoco di parti di oposicion, cu por a mustra interes den e tema. Pues, si a vota contra alomenos mester a bin cu otro proposicion.
“Nos ta wak cu ni paden ni pafo di Parlamento tin seriedad, no tin interes ni enfoke riba e tema aki cu ta salvaguardia e seriedad y honestidad cu nos ta haciendo nos trabao como parlamentario”, Berlis a bisa.
