E presidente di Sindicato ABVO Curacao:
ORANJESTAD (AAN ) – Adri Willems, Presidente di e Sindicato ABVO di Curacao a bishita Aruba, specificamente Sindicato TOPA, na unda el a duna un presentacion tocante digitalisacion.
Willems a señala cu digitalisacion ta un di e cosnan cu ta biniendo cu hopi speed den direccion di sindicatonan cu ta traha den sector gubernamental, y por mira tambe den e proceso di loke Hulanda kier implementa riba e gobierno di Aruba, pa loke ta trata cambionan den su diferente departamentonan, nan a pone digitalisacion cu un di e aspectonan.
El a señala cu nan a pone tambe un “ordering system” cu ta algo cu mester prepara cune, pasobra e sindicatonan no a custumbra, y no a traha, cu e tipo di ambitonan aki.
Willems a sigui splica cu e proceso aki ta hopi dinamico, y sigur pa loke ta concerni digitalisacion.
“Digitalisacion por pone cu gobierno ta kita hopi hende for di trabao, y esnan cu ta keda na trabao mester ta prepara. TOPA lo prepara su mes, pa asina prepara su miembronan pa atende cu esaki, na un manera mas responsable posible y pa scapa cuponan di trabao posible”, e lider sindical a expresa.
Willems a comenta cu den e documento cu el a lesa di Aruba, ta para claramente cu Gobierno no ta bay inverti den ningun empleado publico, y cu ta nan ta responsable pa su formacion, y bende su producto cu gobierno, y como cu ta su trabao e mester zorg pa atende y ta califica pa esey.
El a agrega cu na TOPA tin un bentaha pasobra e ta cuminzando prepara su hendenan, pa por atende cu e discusion cu tin di haber cu digitalisacion cu ta un stap dilanti, pa ora gobierno yega na e stacion ey, pa alomenos e miembronan di TOPA por enfrenta y lo por garantiza nan trabao.
E lider di ABVO a splica cu na Curacao tambe e tema ta den discusion y e ta un stap hopi mas dilanti cu na Aruba. Mester tene cuenta cu tur e manera cu trabao ta bay bira den futuro. Por ta, aki poco dia no tin oficina di gobierno mas; hendenan ta traha na cas of na distancia, na otro parti di mundo, y no necesariamente, e hende Arubiano lo tin trabao tampoco, den un mundo digitalisa. “Pasobra di gobiernonan bay den e plataformanan cu ta ofrece trabao, e por incorpora un hende cu ta tuma job for di Hulanda, of India, y e por haci un trabao specifico pa Aruba, y ora cu e caba cu esey e hende ey no tin ningun responsabilidad cu gobierno ni gobierno tin ningun responsabilidad cune, pero el a bende un producto cu gobierno y esaki ta baha su gastonan. Pues ta imperativo pa comunidad y empleadonan publico prepara nan mes pa nan por domina e materia aki”, Adri Willems a remarca.
