Minister Geoffrey Wever:
- E lo bay directamente den e cartera di e ciudadano
ORANJESTAD (AAN) Minister di Economia, Finanzas y Sector Primario, señor Geoffrey Wever, ta duna di conoce cu den e presupuesto 2026, Gobierno a aloca caba 50 miyon florin adicional, pa mehoracion di e poder di compra, cu lo bay directamente den e cartera di e ciudadano.
“Esey ta pa cumpli cu e compromiso cu Gabinete AVP-Futuro a haci pa mehoracion di e poder di compra, cu ta un prioridad. Nos a demostra esey e prome dia di nos trabao, y pa 2026 nos a percura pa nos a traha nos prome presupuesto completo, di tal forma cu tin e suma ey aloca caba pa duna bek den man di e ciudadano”, e mandatario a reitera.
Cu esaki, el a reitera, e ciudadano por mehora su poder di compra y alivia un poco e aumento di prijs, y pa Gabinete AVP-Futuro goberna na un forma mas efectivo.
“Pasobra, por ehemplo, e reparatie toeslag di 250 florin pa nos grandinan a bay directamente den nan cuenta di banco, tur luna. Bo ta wak’e y bo por gast’e. Reduccion di belasting bo no ta bay wak kizas, directamente, cu e producto baha y kizas e producto cu abo ta cumpra. Pero cu e placa den bo cartera abo ta dicidi den kico bo ta gasta e placa.
Esey mi ta kere ta un manera mas directo y efectivo pa mehora e poder di compra. E ta un escogencia cu nos a haci, y nos a scoge tambe pa reduci e 10 cen di accijn di gasoline cu diesel, y esey si ta un instrument directo, pasobra e gasoline station mester baha nan prijs basa riba e reduccion, debi cu margen nan ta gana riba cada liter. Pues nan no por absorbe e reduccion aki, bo tin cu aplik’e den e prijs cu bo ta paga na final di dia na gasoline station. Pues, e tin un impacto directo den e cartera di e usadornan di gasoline y tambe e empresanan di transporte”, e dignatario a señala.
