Parlamentario Marco Berlis:
ORANJESTAD (AAN) – Den conferencia di prensa di fraccion di MEP, Parlamentario Marco Berlis, a elabora tocante kico gobierno a haci pa contraresta abuso sexual contra mucha.
Berlis a expresa cu e gobierno actual a haci hopi mas cu tur otro gobierno, pa asina fortifica e proteccion di nos muchanan.
E Parlamentario a bisa cu e ta trece e tema aki dilanti, pasobra el a tuma nota den e medionan social cu masha hopi hende ta bisa cu nada a wordo haci, pero hopi cos a wordo haci caba.
AUMENTO CASTIGO: E prome paso cu Gobierno a duna, ta subi bastante e castigo den ley contra abuso sexual di mucha. Esaki a sosode caba un par di aña pasa, y por wak den e ultimo casonan con e castigo a subi, Berlis a subraya.
El a menciona e castigo pa señor Wert pa ken nan ta pidiendo nuebe aña di castigo pa su persona. E parlamentario a indica cu esaki no ta e haltura di castigo den pasado, pa abuso sexual di mucha. Tabata tin castigonan hopi mas abao, di un, dos, tres aña y e ley a procede pa subi e castigonan inmediatamente.
FAMILY JUSTICE CENTER: “Family Justice Center” (FJC) ta e centro cu a wordo introduci pa Minister Rocco Tjon. “Un di e problemanan mas grandi den caso di abuso sexual contra mucha ta, cu hopi biaha no tin evidence” Berlis a señala y splica cu den e caso aki FJC ta brinda na comunidad, ora cu un abuso sexual di mucha sosode, por acudi mesora cu e mucha, na e lugar aki unda cu tin psicologo, recherche, doctor, y tur cos den un lugar, pa asina aki por haya e pruebanan necesario pa acumula, contra e ofensor y ora e denuncia wordo haci tin e pruebanan necesario pa haci e acusacion oficial y asina cera e abusador concerni.
DEFENSOR DI MUCHA: E Kinder-ombudsman a wordo aproba den Ley na Parlamento, poco dia pasa, door di coalicion. Berlis a pone enfasis riba e hecho cu oposicion den su totalidad a bay contra esaki, pero coalicion a aprobe y esey ta nifica cu aworaki, nos muchanan tin un defensor cerca ken por bay directamente, ora e wordo instala. Asina aki tin otro proteccion pa nos muchanan, Berlis a remarca.
“Por wak cu den apenas cinco aña den gobernacion, nos gobierno a traha duro pa haci tur locual ta posible, segun cu nan a priminti pa asegura cu nos muchanan ta wordo proteha” Berlis a reitera.
