Acto di destruccion y kizas buracheria
ORANJESTAD (AAN): E ta algo cu pa hopi tempo caba Aruba ta conoce pa cu actitud di algun militar cu ta bin for di Tera Frieu y ta na Aruba.
Nan ta sali den grupo, ta bira burachi y hunto den gang ta comete actonan cu ta di condena! Y ta parce cu den 2021 ainda e ta socede.
Weekend pasa militarnan Hulandes tabata comprometi den iregularidad nan den area di diverticion aki na Aruba.
Esaki a socede dilanti Highrise Hotelnan den oranan di anochi, unda algun di e militarnan aki a perde cabez y sea pa “diverticion” of pa algo otro a cuminza destrui propiedad di varios negoshi y Shopping Mall cu tin eybanda.
Un batayon di Polis a ser manda pa asina purba controla e situacion. Ora cu agentenan a yega y mira cu ta trata di militar, a core pone Koninklijke Marechaussee na altura.
Un boletin emiti Diaranson mainta procedente di Defensa Hulandes, ta bisa cu nan ta lamenta profundamente e comportacion di esnan concerni dilanti Hotelnan na Aruba, y ta desaproba esaki totalmente. E comportacion encuestion ta totalmente lo contrario di profesionalidad, integridad y un bon ehempel cu ta worde spera di un militar den su function.
Defensa Hulandes tin militarnan permanente presente riba e isla di Aruba, ubica na e base militar, Marinierskazerne Savaneta. Banda di esaki, tambe tin unidad nan for di Hulanda cu regularmente ta bishita e area den Caribe pa entrenamento y ehercicio.
Defensa Hulandes ta para pa e bon comportacion di su trahadornan y ta pone enfasis ariba e function ehemplar den comunidad, cu cada un di su trahadornan ta eherce.
Loke a pasa: Diasabra anochi, den area di divertision, un grupo di militar a presenta y comporta nan mes di tal manera cu ta worde desaproba. Posiblemente asta hecho nan cu ta castigable. Esnan di Marechaussee a start un investigacion pa posibel acto nan castigable y a base di e resultado lo of lo no detene mas personanan.
Defensa Hulandes a confirma cu te na e momentonan aki Marechaussee tin 1 persona deteni riba sospecho di hecho nan castigable.
Defensa Hulandes ta den espera di e resultado di e investigacion andando di parti Marechaussee, y a base di esaki lo tuma mas medida pa cu e caso aki.
