Pueblo a paga pa e inversionnan necesario den su lucha pa bida
- Mentalidad humano y no di robot mester sirbi bida di Arubiano
- Pueblo y Gobierno a percura pa infrastructura basico actual
ORANJESTAD (AAN)- Bienestar di hende ta cuminsa cu luz di bida, cu cual e hende ta topa na su nacemento y ta paga na momento cu e despedi di e mundo aki.
Democracia ta e formula cu ta entrega e derecho na Pueblo pa haya e cuido medico cu ta dicidi pa calidad di estadia di hende na mundo, pa cual Pueblo ta paga.
Na Aruba, cuido medico a bira exclusividad di AZV, cu a kibra democracia pa introduci un sistema, cu hende mester ricibi e cuido medico cu AZV kier brinda cu e posicion exclusivo, comunista, cu a kibra democracia.
Con serio e asunto aki ta, ta bini dilanti den e hecho cu Pueblo ta paga belasting pa un bon maneho di Cuido Medico, pero Pueblo ta obliga pa ley pa uza AZV como su seguro medico exclusivo.
AZV pues, na nomber di Pueblo di Aruba, ta paga cu placa di Pueblo, tur servicio cu ta wordo brinda den cuido medico na forma exclusivo y Pueblo no por nenga di paga y busca otro seguro.
For di momento cu AZV a bira e “fact totum” di Cuido Medico, e tin e deber pa percura pa tur instancia y tur persona cu directamente y indirectamente ta wordo paga pa sigura salud di Pueblo, cumpli cu nan deber.
Parlamento di Aruba mester percura pa e leynan necesario pa Cuido Medico na Aruba y Gobierno mester atende cu e fundeshi cu mester pa tanto Leynan y AZV funciona.
Sector di Husticia, como tercer pata di e Trias Politica, ta atende cu leynan cu finalmente ta condena of acepta e cuido medico cu ta wordo duna.
Esaki ta e funcionamento exigi di Cuido Medico, cu mester pues tene cuenta cu e mentalidad, costumber y moral di e Arubiano cu no ta acerca bida como robot yena cu inteligencia, pero ta mira bida como un regalo precioso cu e ta cuida cu su placa.
E trabou di Gobierno pa pone hospital na e nivel aceptabel pa bienestar a base di norma y moral Arubano, ta mas cu visto. Ministro Dangui Oduber a sorprende hasta DIARIO cu e forma cu den crisis financiero y den Pandemia, el a atende cu salud di Pueblo.
Hasta asbest peligroso a wordo elimina y Hospital sigur a haya tur atencion pa e por duna servicio na Pueblo.
AZV a ricibi e base financiero pa e percura pa bon cuido, loke ta nifica cu e cuido na tur nivel, pa cual Pueblo ta paga, mester ta bon segun concepto di e Arubiano, cu atrobe ta rechasa e forma cu hende ta bira robot na cierto partinan di mundo.
Awe AZV mester garantisa e parti mas importante di Cuido Medico, cu ta e hecho cu e Arubiano cu mester di atencion medico aki, ta haya esaki di Hospital y di tur instancia pa medio di profesionalnan cu no mester briya como robot pero como ser humano cu ta atende cu ser humano.
Si no tin suficiente personal, mester cuminsa atrae personal for di paisnan den nos region tambe.
Importante ta bira cu e servicio cu ta wordo duna na e Arubano, ta honra e balor cu e Arubiano ta duna na bida, na enfermedad, na condicionnan y sentimentonan di e ser humano, cu ta central pa motibo moral pero tambe pa e simpel hecho cu ta e Arubiano ta paga na forma obligatorio, pa medio di AZV, pa e asistencia medico cu e ta ricibi.
Esun cu ta paga, ta dicidi ta ley comercial, cu mester mira den Cuido Medico tambe.
AZV tin e deber pa garantisa un trato humano pa tur Arubiano cu mester di Cuido Medico di hende cu ta hende y no robot cu no tin bista pa e realidad di e ser humano.
