Martijn Balkestein director di KvK
ORANJESTAD (AAN): Durante conferencia di prensa di Camara di Comercio (KvK), Martijn Balkestein -director di Camara di Comercio a enfatisa e importancia di un debate politico.
Balkestein a bisa cu hunto cu Universidad di Aruba, a traha riba estilo di debate hopi interactivo, na unda e lidernan politico por trece dilanti nan pensamento y ideanan pa e siguiente añanan, como tambe solucion riba problemanan actual.
Cada lider politico tin nan mesun agenda y ta enfatisa mas tanto riba cierto tema, manera problemanan social of economico. Y cada ciudadano lo haya e oportunidad pa scucha nan y vota di acuerdo cu loke ta afecta nan mas.
Balkestein a indica cu ta importante pa comunidad scucha bon loke ta wordo treci dilanti den debate, pa despues wak bon si nan candidatonan ta cumpli cu nan promesanan. En realidad, ta esencial pa organisa debatenan politico mas biaha y asina percura pa e politiconan cu ta desvia di cualkier palabracion durante sea debate of campaña, of acuerdo di gobernacion, na unda comunidad por expresa nan opinion.
Na 2017, KvK a organisa e debate nacional y mescos e prome, nan no ta faborece ningun partido politico. Actualmente mayoria partido a confirma nan participacion, pero no a informa ken ta bay presenta na e debate. E formato di e debate ta keda cu lidernan di partido di invita pa participa, pero nan por presenta un otro candidato cu nan kier promove.
Esnan cu ta interesa pa manda pregunta durante e debate, por manda un email, cu a wordo traha special pa e debate, عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.. Un comision cu Universidad di Aruba ta bay revisa e preguntanan y lo selecta esnan mas interesante. Balkestein tambe a indica cu nan lo haci uso di app special cu a wordo desaroyo door di Setar pa percura cu pueblo por indica con nan ta haya e presentacion di e candidatonan pa cada tanda. Nan lo midi esaki mesora y lo divulga esaki durante e debate.
E fecha di debate ta dia 14 di November, pa 7'or di anochi y lo pasa en bibo via Tele Aruba.
