Debate mester deshaci di fantasia politico pa haya voto y duna splicacion corecto - *Presentador mester ta conoci cu tur programa y e capacidad di e candidatonan -*DIARIO ta insisti cu e debate cu Aruba mester ta di organonan halto di estado
ORANJESTAD (AAN) — E lista di debate ta sigui crece na Aruba, cu awor mester haci su mes e pregunta grandi kico ta un debate.
E presentador ta hunga e papel clave den un debate, cu e mester prepara, dirigi y guia. Pa un persona por haci e trabou aki, e mester ta un profesional den dirigi un debate, cu ta mara na regla sumamente pisa, y na actua na cada momento cu e debate no ta sirbi e proposito pa cual ta tene un debate.
Falta di profesionalnan riba nan tereno, a haci cu cantidad di debate ta perde nan derecho di yama nan mes debate y ta bira un tipo di showcase pa partidonan politico presenta nan fantasianan pa un miho futuro, cu realmente ta e peliger grandi di programanan di partido cu ta wordo crea pa atrae voto pero sin estudio profesional necesario.
Tin organisacionnan special internacional cu ta ocupa nan mes cu formacion di personanan cu ta fungi como presentado di un debate. E profesionalnan aki conoce reglanan pa un debate, cu ta mas cu cinco of diez minut.
E preparacion pa debate di e presentado ta cuminsa cu tuma nota di tur loke e partido y su programa ta; tuma nota di tur background, capacidad, experencia, resultado (bon y malo) di un partido y candidatonan ta.
Pa por introduci e representantenan di partidonan, e presentador ta traha un resumen di e persona y e partido. E no ta duna solamente nomber y titulo, pero e ta un duna un breve relato di e partido (cu puntonan positivo y negativo) mescos cu di e candidatonan.
E ta duna e puntonan mas importante di e programa di partido pa eleccion, eventualmente ta mara esaki na e principio ideologico di e partido.
Un debate ta sirbi pa duna pueblo tur informacion cu hopi hende den pueblo no tin y pa deshaci di tur duda.
Un debate ta algo sumamente serio pasobra e mester sirbi como e formula pa deshaci di tur duda cu un votador por tin.
Preparacion di un debate politico, ta tuma pues hopi tempo y ta exigi e conocemento profesional pa prepara y presenta un debate segun reglanan internacional. Pero tambe un debate ta exigi pa e presentador conoce e materia cu e ta atende, e leynan di pais, e forma con mester atende y realisa loke e partidonan ta trece dilanti.
Aruba conoce e resultadonan di falta di informacion riba programanan di partido y e mundo di fantasia cu ta wordo uza dor di politiconan pa haya voto.
Si awe Aruba tin un debe nacional, ta mara na un palo di horca pa debenan di fantasia di fontein cu a bira luga pa adictonan baña, ta pasobra e sistema democratico a faya y tur hende a bati man pa e rapport Bo Aruba, cu Camara di Comercio e tempo mes a adverti cu ta peligroso pa Aruba y cu a duna Camara di Comercio rason.
Camara di Comercio a adverti pa e peliger di proyectonan PPS na Aruba for di momento cu nan a wordo presenta pero no tabata tin hende pa duna contenido na democracia y splica Pueblo kico e proyectonan aki lo a haci cu Aruba.
Un debate mester duna e partidonan tempo pa duna splicacion cu grafico si ta necesario.
Na momento cu un presentado ripara cu un debate no ta sigui e reglanan, e mester actua. Un presentado ta interveni si tin cualkier problema y ta exigi un nivel pa un debate. Si e debate no por honra reglanan, ta stop un debate.
Tumando nota cu e tempo cortico cu tin pa eleccion, DIARIO ta insisti cu e debatenan cu Aruba tabata tin mester, tabata presentacion di representantenan di organonan oficial di Aruba manera Algemene Rekenkamer Aruba, Raad van Advies. Conseho Social Economico cu pa ley no por bay cumpra voto pa partidonan cu palabra bunita, pero si por contesta e forum di Pueblo cu ta haci pregunta riba manehonan cu a wordo hiba y loke Aruba mester den futuro.
