*40 cliente di bijstand lo drenta mercado laboral
ORANJESTAD (AAN)-- Relacionista Publico di Departamento di Asunto Social (DAS), Marceylaine Paskel, den entrevista cu Matutino DIARIO a elabora riba e desaroyonan cu tin, pa gobierno yuda mas hende cu ta ricibi bijstand, den nan buskeda di oportunidad pa subi mercado laboral. Esaki ta wordo realiza den palabracion cu Stichting Ja IK Aruba, conhuntamente cu Departamento Progreso Laboral (DPL).
Paskel a duna di conoce cu nan a traha e trayecto aki cu yama “In the picture” den cual 40 di e clientenan di DAS, sea cu nan haya sosten di guia social, of e sosten financiero mester a forma parti, obligatoriamente, pa un crecemento personal y tambe profesional, unda e meta final ta pa e clientenan aki por drenta bek den e mercado laboral.
“Aworaki, mi por bisa, nos a caba di completa Fase 1, unda cu Stichting Ja IK Aruba, a duna diferente tayer na nos clientenan, sea pa crecemento personal pero tambe con pa nan yega traha ora nan drenta den e mercado laboral. Mi mester bisa cu nos ta sumamente orguyoso cu e ta bayendo hopi bon, y tambe awo nos ta ranca sali cu e Fase 2, di e proyecto aki”, Marceylaine Paskel a relata.
El a reitera cu DAS ta hopi contento y orguyoso di e clientenan participante, pasobra esaki ta un stap grandi pa nan mes.
“Mi por bisa cu di locual Stichting Ja IK Aruba a informa nos tambe, ta cu e pensamento di nos clientenan a cambia a transforma, a cambia, nan ta dispuesto na cuminza di nobo, y esey ta locual nos mester. Pa comunidad mi ta informa tambe cu nos ta sigui traha na bienestar y cu nos clientenan tambe por confia den nos, y nos ta sigui traha pa nan por cuminza cu e etapa nobo aki, cambia nan bida”, Marceylaine Paskel, PR di DAS, a expresa.
“Den e grupo di clientenan tin diferente edad, pero e meta ta keda pa tur hende mesun cos. Tin oportunidad pa tur persona. Nos tin profesionalnan tras di e proyecto aki cu tin hopi pasion ta motiva nan cada biaha pa nan drenta den e mercado laboral”, Marceylaine Paskel a enfatiza.
