ORANJESTAD (AAN): Dialuna mainta, DIARIO a tuma nota cu un dama a dicidi na protesta dilanti oficina di Gobierno riba Lloyd G. Smith Boulevard y e tabatin dos pancarta den su poder.
E señora Liliana Ruiz a indica na DIARIO, cu el a bin protesta pasobra Gobierno a corta den su salario, y tambe salario di su coleganan. Segun Ruiz, den principio e tin nada politico envolvi den su protesta, pero ta enfatiza cu e ta traha duro pa su salario.
Anto loke e ta tende di gobernantenan ta cu nan ta blof aki y blof aya cu ‘Economia ta bayendo bon”, y tur dia ta tende esey. Pero te ainda e mes no ta haya su salario manera debe ser.
Su vakantie uitkering a wordo kita, su premie a wordo kita. E ta un persona cu a bringa pa indexering caba, y manera e ta mira, esey lo bay bira e caso atrobe.
Mas di 14 aña pasa nan a para como 6 siman largo dilanti Parlamento pa exigi pa haya indexering. Awor gobierno ta tuma actitud di coba den saco di hende, sin sa ki gasto cada ambtenaar tin, nada. Unico cos cu nan kier ta ‘placa’.
Ruiz ta lamenta cu husto ta paga pa pecador, pasobra decisionnan robez cu a wordo tuma, na final ta e clase trahador ta esun cu ta bay paga pa tur cos.
