Segun Minister Ursell Arends:
ORANJESTAD (AAN) – Minister Ursell Arends, Minister di Transporte, Integridad, Naturaleza y Sector Primario, a referi den un entrevista na e miedo cu e agricultornan ta demostra, cu Departamento di Belasting lo impone impuesto riba nan, y pesey nan ta nenga suministra data.
Arends a bisa cu esey no ta e caso absolutamente, pasobra como agricultor, piscado y criado di bestia, Departamento di Belasting no ta haci dificil pa nan, solamente si nan ta pasa cierto suma di entrada, ta bin na remarca pa belasting. Pero mayoria di e agricultornan no ta pasando e suma concerni, na e momentonan aki.
Tin companianan cu si a inverti y a bay hopi mas grandi, y eseynan lo mester atende cu belasting. Pero un bez cu Belasting Plan 2023 tambe lo trece claridad pa tur e sectornan aki.
Y pa loke ta trata e asunto di tereno, ya caba su beleidsadviseurnan di su Ministerio, di Minister Presidente y di Minister di Economia, a sinta hunto y ta trahando riba un plan pa haci e terenonan accesible pa agricultura y cria, pa e personanan cu tin necesidad di esaki.
El a señala cu tin cantidad di aplicacion cu a wordo yena den añanan anterior, pero nunca esakinan a wordo concretiza. Awo ta bay centraliza esaki y el a enfatiza cu Santa Rosa ta bay hunta un rol hopi grandi, con ta bay maneha y otorga e terenonan aki.
A bin dilanti den e rapport cu a word haci di Banco Mundial cu nan a identifica cinco obstaculo, pa logra desaroya e sector aki, cu ta awa, coriente, tereno, finanzas y conocemento. Tur esaki, nan ta bezig ta takel y si gobierno tuma e rol di facilita, na Luna di Januari of trempan den 2023, Minister di Economia lo anuncia un Agro-Fond, cu lo yuda brinda e financiamento pa esnan cu kier desaroya agricultura y cria y pasa for di hobby pa bira negoshi.
Aki lo bin tambe e guia di e Business Plan, con e ta bay guia cada un di e personanan aki, pa nan ta exitoso. Esaki tambe ta aspectonan cu gobierno ta trahando riba nan, pa asina engrandece sector primario, segun Minister Ursell Arends a relata.
