OPPA
ORANJESTAD (AAN): Organisacion di Pensionadonan Publico di Aruba (OPPA) a enfatiza cu un observacion, cu Aruba tin un problema di cuido cu ta toca henter e comunidad.
Na Aruba tin mas cu 22 mil persona riba 60 aña. Segun e proyeccion di CBS y di SVb e cantidad di Adultonan Mayor lo sigui crece y e necesidad pa un cuido di calidad tambe lo crece hunto cu e proceso di embehecimento.
Teniendo cuenta cu esaki, ta hopi importante pa nos gobernantenan introduci un maneho strategico pa atende cu nos grandinan awe y no mañan.
Nan a splica cu tin un scarcedad di dokter di cas y tambe di specialista. Esey ta haci cu e cantidad di pashent cu cada dokter di cas tin ta demasiado. Consecuencia di esaki ta cu e pashent a bira un number y e afecto humano a bay perdi.
E scarcedad di specialista ta haci cu e lista di espera ta demasiado largo, specialmente pa nos grandinan. Ta hopi importante pa atende nos grandinan na momento cu mas nan tin mester di e ayudo y e ayudo aki no por depende di e ora of momento cu e persona of instancia encarga ta haya ta bon.
Nos grandinan ta esnan cu ta pasa mas trabao pa haya e atencion cu nan mester na e momento cu mas nan tin mester di dje. Nan ta sinti nan mes bandona y e tin di warda hopi prome cu e por pa haya un cita, sea cu ImSan of cu un specialista.
-Scarcedad di personal cualifica na e centronan di cuido adecua y di bon calidad:
Tin un scarcedad di e centronan aki. Den opinion di OPPA, e gobiernonan di turno semper a traha pa e periodo di gobernacion cu nan ta goberna y nunca a presenta un plan pa atende cu e proceso di embehecimento (vergrijzing) cu ta tumando luga for di basta aña caba na Aruba.
Kico lo por wordo haci (p.e. door di gobierno) a termino corto cu lo duna e efecto mas grandi na e calidad di bida di nos grandinan?
Segun nos ta hopi importante pa atende cu e problema di embehecimento a termino corto, pero esaki tin di bay den un forma strategico y structura.
OPPA semper a boga pa instalacion di un organo di conseho oficial (“Adviesraad voor ouderen: Ouderenraad”) cu e meta pa conseha gobierno riba e asuntonan manera desaroyo y maneho cu ta regarda directamente y indirectamente e poblacion di e adultonan mayo na Aruba.
E temanan principal cu e organo aki tin di atende y cu urgencia ta:
- Acceso y mehoracion di e cuido medico;
- Cuido di calidad pa nos grandinan na e momento cu e mester di dje, sin cu e mester warda;
- Seguridad y Proteccion;
- Mobilidad.
- Transporte pagabel pa e grandinan;
- Pensioen, un entrada cu por cumpli cu e necesidad basico di e adulto mayor;
- Oportunidad igual di desaroyo, integracion y participacion social.
- OPPA observacion ta cu tin un scarcedad (tekort) na centro di cuido adecua (bon manteni y cu suficiente personal cualifica), hopi caminda nan ta haya poco atencion/bishita/actividad y tambe ta mustra manera no tin hopi opcion pa un bon cuido pa esnan cu no tin hopi placa pa gasta. Dus tin un gap grandi a base di e inkomensklasse cual den nan parecer no ta husto.
Nos ta propaganda nos isla como “ONE HAPPY ISLAND” pero nos ta lubida riba e felicidad comun cu tin di conta pa henter e comunidad y sin lubida cu nos GRANDINAN tambe merece di ta feliz.
Gobierno y e comunidad Arubiano tin un deber pa cu su grandinan.
Nos grandinan tin derechonan cu no por ta poni solamente riba un pida papel di Organisacion di Nacionnan Uni (UNO), pero e adultonan mayor mester sinti esey tambe for di e comunidad di cual nan a yuda crea y ta forma un parti hopi importante di dje.
Cuido di nos grandinan no por depende di nan entrada pasobra esey lo ta e inhusticia di mas grandi cu un comunidad por haci cu su adultonan mayor.
Ta hopi importante pa nos comunidad realmente respeta e derechonan di nos grandinan, duna nan respet, proteccion, cuido y participacion.
Por ultimo mi termina cu e palabranan di e celebre Sr. Nelson Mandela: "Un comunidad cu no ta duna su grandinan e balor cu nan merece ta nenga nan raiz y ta pone e futuro di e comunidad na peliger."
Nos obhetivo mester ta pa mehora (eleva) nan capacidad pa sostene nan mes mas hopi cu ta posibel y na momento cu nan no por haci esey nos tin di cuida nan.
