Pastoor Jairo di Santa Cruz:
ORANJESTAD (AAN): Riba Diaranson, oficialmente temporada di Cuaresma a cuminza cu Dia di Shinishi. Pa tur Cristian, esaki a marca tambe e comienzo di Cuaresma, pa bo biba den presencia di Dios.
“Den Cuaresma ta papia di yuna, di comparti cu otro, y Papa Francisco ta invita tur hende pa yuna y oracion specialmente pa e situacion cu ta andando aworaki na Ucrania,” ta loke Pastoor Jairo Maduro di Parokia Inmaculada Concepcion di Santa Cruz a indica.
Cuaresma ta un temporada cu nos ta pasa den dje, y ta haciendo tur esaki, y nos ta biba den austeridad. Yunamento no semper nifica djis cuminda, pero tambe tur otro cos cu nos ta gusta haci, nos ta pone un banda pa asina saca mas tempo pa medita riba e pasion di Señor, y busca momentonan pa meditacion y oracion.
Cuaresma ta invita nos tambe pa comparti cu otro, caridad semper ta kita arsenal di pica for di nos. Nos ta yama pa comparti pa esnan cu tin necesidad. Pesey hopi parokia ta organiza un ‘Limosna pa Cuaresma’ y esaki ta pa cualkier meta.
Cuaresma ta un temporada di bini bek, manera Profeta Joel ta bisa. Un caminda di combersion, dilanti un Dios cu semper ta warda riba nos. Dios ta warda riba nos pa bini bek, manera Profeta Joel ta bisa nos.
E ta anima nos pa nos pensa riba nos mesun bida, nos relacion cu Dios, nos trato cu otro. Kiermeen esey ta e caminda di Cuaresma.
Con mayornan tin di guia hobennan den e temporada aki? Pastoor Jairo ta corda cu semper un mucha lo bay haci, loke e mira su mayornan ta haci. Esey kizas nifica cu mayornan tambe lo mester haya guia.
“Pero nos tur mester di guia pa nos keda cerca Dios. Pa tur cos rond di nos mester tira un mensahe positivo den nos direccion,” Pastoor Jairo a bisa.
Hopi biaha nos ta keha cu hobennan ta ‘bay den mal caminda’, pero e hobennan ta di unda nan ta haya e ehemplo ey? Di unda nan ta haya e ehemplo di anti-balornan, di e ehemplo di biba leu for di Dios? For di e grandinan mes nan ta haya esey. Di hopi hende cu mester ta ‘ehemplo den comunidad’, pero mayornan tambe tin e tarea ey. Pero e ta un tarea conhunto cu nos tur!
Pastoor Jairo tabata Diaranson mainta na un Scol Preparatorio, y el a bisa e docentenan cu mañan nan mester bay conta cu e muchanan aki como hendenan drechi den comunidad, hendenan cu ta carga cu balornan cu ta bay haci nan trabao semper cu honestidad.
Kiermeen semper nos ta bay bisa esey! Hobennan, kico nos lo bay haci cu nan?
Na prome lugar, mester puntra con nos por mustra nan e caminda corecto pa biba, y haci esey cu nos mesun ehemplo di bida. E ta un tarea di cada un di nos tur!
Cuaresma no ta temporada di fiesta, pero Pastoor ta mira cu net awor cu a flexibiliza medidanan pa cu e pandemia, ya lo bo ta hayando hendenan ta promove temporada di campamento, etc. E ora ey, nos ta dilanti un Dios cu ta respeta nos libertad, pues abo mes ta escoge unda bo ta bay, haci con cu bo ta bay biba bo Cuaresma, y con bo ta haci esey dilanti Dios.
Djis corda cu den Cuaresma, nos tur ta wordo yama pa cana e caminda di combersion, pa asina nos bira un ehemplo skerpi, cu testimonio creible pa nos generacion nobo pa nan mira cu e mihor manera pa biba ta, cu aunke nos por tin hopi cos na nos man, cosnan di tecnologia, pero tambe e mihor manera pa biba ta pa biba den presencia di Dios, y biba cu e balornan di mas halto.
E ta bisa esey, debi cu comunidad mes ta sufriendo hopi, cu aumento di delincuencia, y tin problema cu ta hiba e hobennan na un situacion. Ora e hoben no ta haya chens, toch e ta busca un manera pa realiza su bida, y aki e ta subi e caminda robez. Nos cu tin tur medio y mensahe den nos man, Iglesia, Cas, Famia, Scol, y Social Media, mester manda mensahe di speranza, mensahe di cambio, y mensahe di balor pa e generacion nobo, pa mañan nos por conta cu nan.
