Presidente di CUA Frans Ponson:
*Mientras stranhero ta bin cumpra 10 pa 20 cas, pa local prijs di cas ta impagabel!
ORANJESTAD (AAN) – Durante un conferencia di prensa di Comerciantenan Uni Aruba, Frans Ponson, presidente, a bisa cu den e ocasion aki e kier a trece dilanti un tema cu tin nos comunidad preocupa.
E tema aki ta “prijs di cas y tereno, vivienda, pa nos localnan, Arubiano, aki na Aruba”. Ponson a corda cu tempo di covid-19 por a wak ora mester a sera tur hende hunto den cas, y cu gobierno a habri toke di keda pa hende no por a sali, pasobra hopi problema social a surgi den e tempo di pandemia.
“Pero kico ta pasando aworaki. Como bon dunador di trabao, e comerciantenan ta haya cu e situacion aki ta biniendo dilanti. Door cu nos ciudadanonan no por yega na un cas, bo ta haya cu nos tin cu biba den cas di nos mama y nos tata, pero si nos mama y nos tata tin dos of cuater yiu, nos tur tin cu biba cu nos parehanan den e cas aki, loke tambe ta trece problemanan social pasobra cu nos tur ta den e cas”, Frans Ponson a acentua.
El a splica kico CUA kier a duna di compronde cu esaki. “Ta imposible pa un hende local yega na un tereno of un cas awe. E ta imposible! No tin nodi splica ningun hende riba e topico aki, door cu nos tur tin cu biba den un cas”, el a reitera.
El a sigui bisa cu si nos studiantenan ta bay Hulanda, nan ta haci un debe, nan tin cu bolbe Aruba paga nan debe y yega na un tereno cu nan no por paga, pasobra prijs di casnan ta simplemente impagabel!
“Ora mi papia di nos Arubianonan mi tin cu rectifica. Ta e hendenan cu ta biba akinan. Mi no ta worry ken nan ta, si bo ta biba den e pais aki, bo ta contribui, bo ta paga belasting, nos ni un no por yega na un cas. E topico aki, pa nos specifica, ta rond mundo, no ta na Aruba so. Pero rond mundo y na Hulanda ora bo no ta yega na un cas, bo por sali pafo di un ciudad, bo haye na un prijs barata. Na Merca, ora den ciudad ta bira hopi caro, bo por bay pafo. Spaña, Hawaii, tur caminda bo ta wak e problema aki”, Frans Ponson a señala.
Pero Aruba ta un isla masha chikito y nos si, no tin caminda di move. Pariba di Aruba ta full grondgebied, cu bo no tin nodi traha cas. Nos ta masha, masha limita.
“Si gobierno, gremionan, nos tur no ta sinta hunto bin cu un plan pa e pais aki, e cas, vivienda ta bay ta pa tur stranhero cu ta bin cumpra 10, 20 cas, manera por wak caba ta pasando, y nos, Arubianonan, ta bay caba den algo cu gobierno ta bay traha pa pueblo di Aruba, somewhere, unda nos ta bay biba den hukinan di dos pa tres, pero no tin manera pa nos yega na un cas”, Frans Ponson a señala.
