Hose Figaroa, presidente di FTA:
*Pa no ripiti con a sosode den pasado
ORANJESTAD (AAN)—DIARIO a entrevista e Presidente di Federacion di Trahadornan di Aruba (FTA), tocante e hecho cu e scarcedad di trahado pa area di Horeca ta keda un preocupacion den e sector. Figaroa ta mira importacion di trahado como un hecho cu ta bay sosode, nos gusta of no.
Hose Figaroa a expresa cu e preocupacion ta mesun cos. Y no tanto pa e hecho cu mester importa hende, sino cu Aruba ta para dilanti di un problema grandi di scarcedad.
El a señala cu tin un cantidad di camber di hotel cu ta biniendo acerca, cu ta bay habri for di aworaki te fin di aña, y por verwacht basta camber pa cual mester di hende pa traha, y simplemente no tin suficiente hende na Aruba pa haci e trabao aki.
“Cu ta bay importa hende ta un hecho cu nos por ta di acuerdo of no cu mi, pero e mester sosode. Loke si ta preocupa nos ta con y bao ki condicion nos ta bay importa trahado. Nos tin basta tempo haciendo e pregunta ey, pasobra mester tin claridad riba kico e maneho ta bay bira, pa cu importacion di trahado”, Hose Figaroa a subraya.
Figaroa a sigui bisa cu den pasado, fin di añanan 80 cuminzamento di añanan 90, Aruba a conoce un boom caba, unda cu hopi trahado a wordo importa pero door cu no tabata tin un maneho fiho, con bo ta haci e tipo di importacionnan ey, y exigencianan kico ta e rekisitonan pa por haya un trabao na Aruba, a surgi diferente consecuencia, por ehemplo di importa hende di mas na cierto momento.
“Pero, tin consecuencianan na largo plazo tambe y esey nos ta cuminza wak aworaki, cu tin di haber cu esnan cu a bin traha na Aruba den e añanan ey, aworaki ta yegando edad di pensioen, por ehemplo, pero e problema ta cu debi cu no a traha hopi aña aki na Aruba, nan no tin derecho na un suma di pensioen completo”, Figaroa a señala.
Hose Figaroa a trece dilanti cu varios di nan ta yegando 65 aña cu ta edad di baha cu pensioen, pero loke nan ta bay haya pa luna ta un 450 florin y consecuencia ta cu e trahadornan aki no por laga nan trabao, no por stop di traha pues ta bay crea un situacion cu hende cu nan edad a bira halto caba ta haya nan forza di sigui traha, of ta bay busca otro tipo di trabao pa nan haya entrada pa nan por subsisti.
“E tipo di cosnan aki nos mester tene cuenta cu ne na momento di bay importa trahado unda cu bo mester pone cierto condicionnan, por ehemplo mare na cierto edad, p’asina e ta na tempo cu si mañan e keda Aruba y yega na edad di pensioen, alomenos e tin algo acerca cu e por baha cu pensioen sin problema”, Hose Figaroa a subraya.
