Aruba mester ta prepara pa resultadonan di inseguridad mundial --- *Futuro directo di turismo desconoci den un situacion cu ta escala --- *Cifranan alarmante di Coronavirus scondi y suspenso total na Rusia
ORANJESTAD (AAN) — E suspenso mundial ta alcansa su punto maximo den ultimo decada.
Ayera tabata cera cu preocupacion grandi di World Health Organization, cu ta pidi mundo pa atende cu Covid-19 como menasa sumamente serio, mientras militarnan Mericano tabata wordo manda direccion Europa, pendiente di e forma cu Rusia a circula y asina isola Ucraina.
Aruba mester prepara su mes pa un situacion mundial, cu ta carga di inseguridad cu atrobe por efecta turismo na un forma serio.
E informacionnan aki ta basa riba experencianan cu mundo tin den situacionnan di tension di guera, ora cantidad di hende ta prefera di keda nan cas atento di desaroyonan cu ni sikiera ta alcansa e situacion actual.
Informacionnan for di Europa ta indica contacto entre Rusia y paisnan cu ta sostene su maneho pero tambe contacto directo di paisnan Europeo sigur y otro paisnan democratico cu Ucraina.
Placa, material y militarnan ta wordo pone dor di mundo liber na disposicion di Ucraina, cu ta completamente isola dor di regimen di Putin di Rusia, cu a circula henter e pais.
Por papia pues di dos campo cu ta wordo forma den un zona di guera, cu ainda Rusia ta desmenti pero despues di accionnan Ruso cu ta confirma confrontacion.
Na mes momento e enemigo scondi di hende, Covid-19, ta motibo pa alarma di parti di e organisacion mundial di salud, WHO, cu ta sumamente preocupa cu e forma cu hende kier declara un final pa e pandemia.
E dirigentenan di WHO a adverti cu ainda e peligro no a termina y cu por papia actualmente di 90 Miyon caso registra di Covid-19 cu ta percura pa un aumento enorme di casonan den hospital pero ta conduci na cantidad di morto cu a aumenta den e ultimo dianan.
World Health Organization a emiti un advertencia pa mundo pa no deshaci di medidanan cu a wordo tuma contra Covid-19.
Ta conoci cu paisnan manera Dinamarca a dicidi pa deshaci di tur medida mientras ainda e pais conoce un cantidad enorme di caso di e malesa.
Na otro paisnan mas medida ta wordo tuma pa evita cu Covid-19 ta drenta como parti di turismo.
Un advertencia serio a wordo lansa ayera na Hulanda caminda un investigacion a duna prueba cu 25 porciento di personanan cu wordo admiti na Hospital no tabata na haltura cu nan tabata tin Covid.
Esaki ta nifica cu un grupo mucho mas grandi cu ta wordo pensa, tin Covid-19 sin cu nan ta na haltura,.
Ta ora nan test ta bira conoci cu nan tin e malesa cu cual nan por contagia otro persona.
Na e hospital en cuestion, 25 porciento di persona cu a wordo admiti pa malesa cu no ta Covid-19, a resultado di ta infecta cu e virus.
Tur informacion ta indica cu Aruba mester ta consciente di e situacion mundial sumamente alarmante den cual un situacion di guera hopi serio cu ta sigui escala, por afecta de situacion mundial y resultadonan positivo pa Aruba.
Na mes momento autoridadnan medico internacional ta confirma, cu ainda no por papia di e fin di Covid-19 pero cu mas bien mester ta prepara pa otro ola, cu segun expertonan na varios pais, ya a anuncia su mes na varios parti di mundo.
