ORANJESTAD (AAN): Awe Dialuna, tabatin planea pa e isla aki ricibi bishita di e crusero ‘Valiant Lady’ di Virgin Voyages cruiseline.
Sinembargo debi na e situacion na Venezuela, ya caba desde Diasabra nan a tuma e decision cu ta cancela e bishita di Dialuna 5 di Januari 2026 na Aruba, y e bishita di Diamars 6 di Januari 2026 na Curaçao.
“Debi na e evolucion di e situacion na Venezuela, a haci algun ahuste cuidadoso na e ruta pa e mihor interes di e pasaheronan y tripulacion,” nan a indica den un boletin. E barco Valiant Lady tin capacidad pa 2.770 pasahero.
Envez di Aruba, awe nan lo mara na capitan Bridgetown di Barbados. Mañan envez di Curaçao, nan lo nabega pa capital Castries na isla di St. Lucia.
Pero nan bishita na St. John’s (Antigua), y Philipsburg (St. Maarten) lo keda sin cambio. Tur pasahero cu tabatin excursion gebook caba pa Aruba of Curaçao, a wordo cancela automaticamente y placa a ser debolbi.
Awe lo tin un otro crusero cu si ta drentando waf di Aruba, esta “Europa 2”, cu tin capacidad pa 516 pasahero.
