Fondo Monetario Internacional a confirma mas problema pa mundo --- *Despues di Covid-19 invisibel Gobierno confronta cu crisis inespera --- *Decision frontera cera cu Venezuela a resulta clave pa seguridad Aruba
ORANJESTAD (AAN) — Seguridad Nacional tin tur atencion di Reino Hulandes cu na Hulanda mester sostene e defensa di integridad di Ukraine contra Rusia mientras cu na Aruba, mester tin atencion total pa loke lama por trece na forma scondi pa Aruba den e crisis mundial nobo.
Na 2017, Prome Ministro Evelyn Wever-Croes no tabata e prome yama pa asumi gobernacion di e pais.
E ganador di eleccion Mike Eman a base di un caida considerabel den voto, a dicidi cu e ta retira di politica y lo no fungi como formador.
Resultado tabata formacion di e prome Gabinete Evelyn Wever-Croes, cu tabata tin como tarea central, atende cu e situacion financiero y economico di Aruba.
Ariba tereno financiero Aruba mester a dicidi pa medidanan severo pa atende cu e peso di debe cu mester a wordo paga mientras riba tereno economico e proyecto Citgo cu mester a trece recuperacion economico di 15 porciento segun e gobierno saliente di Mike Eman, a tranca.
E prome reto pa Prome Ministro Evelyn Wever-Croes tabata, pa introduci medida severo pa atende cu e problemanan financiero cu tabata tin Aruba den estado di bancarota, manera Gobierno di Reino mes a splica.
E segundo reto tabata pa saca Aruba for di e incertidumbre riba tereno economico causa pa e proyecto Citgo, cu haci produccion di cifranan pa planificacion dor di tur instancia oficial, imposibel.
Na 2020, Gobierno Wever-Croes a logra yega na cifranan den cual entrada y gastonan tabata den balansa.
E enemigo invisibel Covid-19 a ataca y paralisa economia di Aruba y a entrega na Prome Ministro Wever-Croes e reto pa atende cu solucion pa e crisis financiero hunto cu e crisis Covid-19 cu a hinca Aruba den estado di guera pa medidanan di emergencia cu a cera porta pa turismo y a haci cu tur trahador mester a bay “shelter” na cas pa scapa nan bida.
Aruba a sigui cana y a sigui traha riba recuperacion economico y mester a tuma mas medida dirigi pa Reino Hulandes, cu a presenta e plan di reforma COHO pa e Aruba cu tabata coho, por a sigui cana.
A activa e plan di recuperacion di Aruba, cu mescos cu casi henter mundo, a saluda 2022 sin realisa cu Rusia lo a dicidi pa sigui cu su plan di expansionismo di 2014 y menasa cu invasion di Ukraine.
Di e forma aki, Prome Ministro Wever-Croes mester acepta su tercer reto y Aruba mester ta prepara pa sigui cana den un mundo, cu lo ta diferente na loke a wordo planea.
For di 2021 ya DIARIO a prepara Aruba pa e realidad, cu e prijs di petroleo lo a sigui subi cu resultado pa e costo di bida, mientras e Fondo Monetario Internacional a adverti cu e atake di Omicron tambe a hinca mundo den reverse.
Ayera e crisis di Ukraine tabata sigui crece como menasa mundial pa un guera, pero tambe pa explosion di prijsnan.
E Fondo Monetario Internacional a adverti mundo pa e impacto cu esaki lo tin riba aumento mas severo di e costo di bida.
Asina e organisacion internacional, cu ta vigila e e situacion mundial financiero y monetario a confirma cu un tempo sumamente dificil ta dilanti porta pa mundo y pues pa Aruba tambe.
A adverti pa aumento importante di costo di bida, cu lo exigi pasonan di Gobierno riba e tereno aki.
Mientrastanto a keda e situacion sumamente serio riba tereno di seguridad nacional pa Aruba cu ta dilanti di e costa di Venezuela, cu ta e aliado grandi di Rusia.
Esaki ta nifica problema serio pa e seguridad nacional di Aruba y ta afirma e forma corecto cu Prome Ministro Wever-Croes a atende cu apertura di e frontera cu Venezuela,
E aliansa entre Venezuela y Rusia, ta problema serio pa e paisnan cu frontera cu Venezuela y sigur cu Colombia cu ya a mira con e frontera a bira porta pa refugiadonan pero tambe pa persona peligroso cu ta sconde den e gruponan di refugiado.
No ta descarta e posibilidad cu e aliansa Rusia y Venezuela, ta permiti Rusia yega costa di Colombia.
E tercer reto cu Prome Ministro Wever-Croes ta confronta ta sumamente serio. E ta exigi atencion pa medidanan financiero cu mester tuma pero tambe medidanan importante hunto cu Reino Hulandes pa garantisa e seguridad nacional di Aruba.
DIARIO hunto cu expertonan ta sigui desaroyonan pa informa Aruba.
